Sentyabrın 14-də Bakıda Türk Dövlətləri Təşkilatına (TDT) üzv ölkələrin Müsəlman Dini İdarələri rəhbərlərinin VII görüşü keçirilir.
AZƏRTAC xəbər verir ki, tədbirin açılışında Azərbaycanın Dövlət Himni səsləndirilib və Qurani-Kərim tilavət olunub.
Görüşə sədrlik edən Qafqaz Müsəlmanları İdarəsinin sədri, Şeyxülislam Allahşükür Paşazadə salamlama nitqi ilə çıxış edib.
Toplantıda müsəlman dini qurumları arasında əməkdaşlığın daha da gücləndirilməsi, ailə institutunun qorunması və möhkəmləndirilməsi, elm və texnologiyaya İslamın yanaşması və digər aktual məsələlər müzakirə olunur.
TDT-yə üzv ölkələrin Müsəlman Dini İdarələri rəhbərləri Şurasının VII görüşündə Azərbaycan, Türkiyə, Qazaxıstan, Qırğızıstan, Özbəkistan, Türkmənistan və Şimali Kipr Türk Respublikasının dini qurumlarının rəhbərləri iştirak edirlər.
Ümumilikdə tədbirə 40 ölkəni və 15 beynəlxalq təşkilatı təmsil edən dövlət, elm və din xadimləri qatılıb.
İştirakçılar Fəxri xiyabanı ziyarət edib
Görüş iştirakçıları sentyabrın 14-də Fəxri xiyabanı da ziyarət ediblər.
Qonaqlar Azərbaycanın Ümummilli Lideri Heydər Əliyevin məzarı önünə əklil qoyaraq onun xatirəsini ehtiramla yad edib və ruhuna dualar oxuyublar.
İştirakçılar görkəmli oftalmoloq-alim, akademik Zərifə Əliyevanın da məzarını ziyarət edərək üzərinə gül dəstələri qoyublar. Tanınmış dövlət xadimi Əziz Əliyevin və professor Tamerlan Əliyevin məzarları da ziyarət olunub.
Şeyxülislam : Türk dövlətləri arasında mənəvi həmrəylik möhkəmlənir
Qafqaz Müsəlmanları İdarəsinin sədri, Şeyxülislam Allahşükür Paşazadə görüşdə bildirib ki, Azərbaycandan başlayan məhsuldar əməkdaşlığın uğurlu davamı türk dövlətləri arasında mənəvi həmrəyliyin daha da möhkəmlənməsinə xidmət edir.
Onun sözlərinə görə, Ulu Öndər Heydər Əliyev türk xalqlarının ortaq köklərə bağlılığını “bir ağacın budaqları” ifadəsi ilə təsvir edib.
Şeyxülislam Prezident İlham Əliyevin “Türk dünyası bizim ailəmizdir” fikrini də xatırladaraq bildirib ki, dövlət başçılarının siyasəti nəticəsində türk dövlətləri arasında ortaq dini və mənəvi dəyərlərə xüsusi ehtiram göstərilir.
QMİ sədri TDT-yə üzv dövlətlərin xalqlarının çətin və sınaqlı günlərdə bir-birinə dəfələrlə qardaşlıq dəstəyi göstərdiyini vurğulayıb.
O, 44 günlük Vətən müharibəsi zamanı Türkiyənin Azərbaycana göstərdiyi hərtərəfli və qətiyyətli dəstəyi xüsusi qeyd edib.
A.Paşazadənin sözlərinə görə, Azərbaycanın işğaldan azad edilmiş ərazilərinə Böyük Qayıdışı və Qarabağda aparılan genişmiqyaslı bərpa-quruculuq işləri zamanı da TDT-yə üzv qardaş dövlətlər Azərbaycana dəstəklərini əsirgəməyiblər.
QMİ sədri bu həmrəyliyin və qardaşlıq münasibətlərinin türk dünyasının birliyinin və qarşılıqlı dəstəyinin mühüm göstəricisi olduğunu bildirib.
Türk Dövlətləri Təşkilatının Müsəlman dini liderlərinin 8-ci Görüşü Türkiyədə keçiriləcək.
Bunu Qafqaz Müsəlmanları İdarəsinin sədri Allahşükür Paşazadə Türk Dövlətləri Təşkilatının Müsəlman dini liderlərinin 7-ci Görüşündə deyib.
O qeyd edib ki, bu görüşlər Türk Dövlətləri Təşkilatına üzv ölkələrin rifah və tərəqqisinə yeni töhfələr verir.
