Rusiya İran və ABŞ arasında fikir ayrılıqlarının aradan qaldırılmasına kömək etmək üçün vasitəçi rolunu oynamağa və İranın zənginləşdirilmiş uranını qəbul etməyə hazırdır.
Bunu Rusiya prezidentinin mətbuat katibi Dmitri Peskov “Al Jazeera” telekanalına açıqlamasında bildirib.
Peskovun sözlərinə görə, tərəflər müraciət edəcəyi təqdirdə Moskva vasitəçilik səylərinə qoşula bilər. Rusiyanın məqsədlərindən biri Fars körfəzi regionunda hərbi gərginliyin daha da artmasının qarşısını almağa kömək etməkdir.
Kremlin nümayəndəsi qeyd edib ki, Tehranla Vaşinqton arasında danışıqlarda İranın zənginləşdirilmiş uranı əsas mübahisəli məsələlərdən biri olaraq qalarsa, Rusiya bu materialı öz ərazisində qəbul etməyə hazırdır.
Peskov əlavə edib ki, İran məsələsi Moskva ilə Vaşinqton arasında təmaslarda mütəmadi müzakirə olunur. Tərəflər bu mövzu ilə bağlı fikir mübadiləsi aparırlar.
