QR kod
Dünyada hər beşinci bank kartının PIN-kodunu demək olar ki, ilk cəhdlərdə təxmin etmək mümkündür.
Mütəxəssislər milyonlarla PIN-kodu təhlil edərək insanların ən çox hansı rəqəm kombinasiyalarından istifadə etdiyini müəyyənləşdiriblər. Bu cür sadə kodların fırıldaqçıların ilk yoxladığı variantlar sırasında olduğu bildirilir.
Polşanın “Onet” nəşrinin məlumatına görə, araşdırma zamanı 3,4 milyon dörd rəqəmli PIN-kod analiz edilib.
Ən çox istifadə olunan 3 PIN-kod
Dörd rəqəmli PIN-kod nəzəri olaraq 10 min müxtəlif kombinasiyadan ibarət ola bilər. İnsanlar rəqəmləri təsadüfi seçsəydilər, düzgün kodu tapmaq kifayət qədər çətin olardı.
Lakin araşdırma insanların müəyyən sadə kombinasiyalara üstünlük verdiyini göstərib.
Ən çox istifadə olunan üç PIN-kod bunlardır:
1234
1111
0000
Bu üç kombinasiya birlikdə təhlil edilən bütün kodların təxminən 19 faizini təşkil edir.
Bu isə o deməkdir ki, təxminən hər beşinci PIN-kod ən geniş yayılmış variantlardan biridir və belə kodlar fırıldaqçıların diqqətini daha tez cəlb edə bilər.
İnsanlar niyə sadə PIN-kod seçirlər?
Mütəxəssislər bunun əsas səbəbini yadda saxlamağın asan olması ilə izah edirlər.
İnsanlar ardıcıl rəqəmlərdən, təkrarlanan kombinasiyalardan və bəzən doğum tarixləri kimi şəxsi məlumatlarla əlaqəli rəqəmlərdən istifadə edirlər.
Belə PIN-kodlar kart sahibinin yaddaşını yormur. Lakin eyni xüsusiyyət onları kənar şəxslər üçün də daha asan təxmin edilən edir.
Mütəxəssislər bank kartlarının təhlükəsizliyi üçün 1234, 1111, 0000 kimi geniş yayılmış kombinasiyalardan və asan təxmin edilən şəxsi tarixlərdən istifadə etməməyi tövsiyə edirlər.
Sunay Aydın
