Qərb ölkələrinin siyasətçiləri və diplomatları Ukraynaya səfər edərkən riskləri “ayıq şəkildə qiymətləndirməlidirlər”.
Bunu Rusiya Xarici İşlər Nazirliyinin rəsmi nümayəndəsi Mariya Zaxarova bildirib.
“Belə səfərlərin bəzilərindən əvvəl diplomatik kanallarla bizə müəyyən şəxslərin təhlükəsiz şəkildə keçidini təmin etmək barədə müraciətlər daxil olur. Bu cür müraciətlərə cavabımız dəyişməz olaraq belədir: əvvəllər açıq şəkildə səsləndirdiyimiz xəbərdarlıqlar qüvvədə qalır və Qərb siyasətçiləri ilə diplomatlar mövcud riskləri ayıq şəkildə qiymətləndirməlidirlər”, – Zaxarova deyib.
O əlavə edib ki, həmin ölkələrin nümayəndələrinin Ukraynaya səfərləri zamanı “heç kim onların təhlükəsizliyinə zəmanət verə bilməz”.
Rusiya XİN bu açıqlamanı Polşa sərhədi yaxınlığında Ukraynaya məxsus qatara Rusiya ordusunun hücumu ilə bağlı sualı cavablandırarkən verib.
Sentyabrın 13-də Volın vilayətindəki “Yaqodin” stansiyasında sərnişin qatarının lokomotivi vurulub.
Kiyevdə ehtimal edilir ki, hücumun hədəfi bir neçə Avropa İttifaqı ölkəsinin təhlükəsizlik məsələləri üzrə müşavirlərinin və Böyük Britaniyanın keçmiş baş naziri Boris Consonun olduğu diplomatik qatar olub.
Hücum zamanı stansiyada dayanan digər qatarlardan birində isə Mərkəzi Kəşfiyyat İdarəsinin (CIA) keçmiş rəhbəri Devid Petreusun olduğu bildirilib.
Zaxarova onları “siyasi turistlər” və “VIP şəxslər” adlandırıb. Onun sözlərinə görə, Kiyev bu şəxslərdən “öz hərbi eşelonlarını ört-basdır etmək” üçün istifadə edir.
