Avropa İttifaqında 13 yaşdan aşağı uşaqların sosial şəbəkələrdən istifadəsinin qadağan edilməsi planlaşdırılır.
Avropa Komissiyasının sədri Ursula fon der Lyayen Strasburqda çıxışı zamanı bildirib ki, Aİ uşaqların internetdə müdafiəsi ilə bağlı yeni qanun layihəsi hazırlayır.
“Heç bir sosial şəbəkə 13 yaşa qədər. 15 yaşa qədər isə heç bir şəxsi hesab”, – fon der Lyayen deyib.
Onun sözlərinə görə, qanun layihəsi sentyabrın 17-də təqdim olunacaq.
Yeni qaydalar uşaqların yaşından asılı olaraq internetdən istifadəsinə mərhələli məhdudiyyətlər tətbiq etməyi nəzərdə tutur.
Belə ki, 13-15 yaşlı uşaqlar sosial şəbəkələrdə onlar üçün uyğunlaşdırılmış hesablardan istifadə edə biləcəklər. Lakin bu hesablara vaxt məhdudiyyəti qoyulacaq. Hesabların valideynlər tərəfindən yaradılması və nəzarətdə saxlanılması nəzərdə tutulur.
15-18 yaşlı yeniyetmələr üçün isə sosial media platformaları xidmətlərini daha təhlükəsiz formada qurmalı olacaq. Bu yaş qrupunda uşaqların təhlükəsizliyini təmin etdiyini sübut etmək öhdəliyi texnologiya şirkətlərinin üzərinə qoyulacaq.
Fon der Lyayen uşaqların sosial media və smartfonlardan istifadəsinin onların uşaqlıq dövrünə təsir etdiyini bildirib.
“Uşaqları uşaqlıqdan məhrum edirlər”, – Avropa Komissiyasının sədri deyib.
Onun sözlərinə görə, uşaqların düşünmək, öz qərarlarını vermək və hətta sadəcə darıxmaq üçün vaxta ehtiyacı var.
“Amma uşağın smartfonu varsa, o, bütün bunlardan məhrum olur”, – fon der Lyayen bildirib.
