ABŞ Hərbi Dəniz Qüvvələri İrana qarşı dəniz blokadasını bərpa etdikdən sonra İranla əlaqəli, İran limanlarına gedən və ya oradan çıxan 104 ticarət gəmisinin qarşısını alıb.
Bu barədə ABŞ Silahlı Qüvvələrinin Yaxın Şərq üzrə Mərkəzi Komandanlığı (CENTCOM) cümə axşamı məlumat yayıb.
“17 sentyabr tarixinə ABŞ qoşunları qaydalara tam riayət olunmasını təmin etmək məqsədilə 104 kommersiya gəmisinin istiqamətini dəyişdirib”, – məlumatda bildirilib.
ABŞ Hərbi Dəniz Qüvvələri İran limanlarına və sahilyanı ərazilərə gedən və ya oradan çıxan gəmilərə qarşı dəniz blokadasını 14 iyulda bərpa edib. Bundan əvvəl blokada rejimi 13 apreldən 18 iyuna qədər qüvvədə olub.
Həmin dövrdə ABŞ Mərkəzi Komandanlığının qüvvələri blokadaya əməl edən 142 gəminin istiqamətini dəyişdirib, qaydalara əməl etməyən 9 gəmini fəaliyyətdən çıxarıb. Eyni zamanda humanitar yardım daşıyan 50-dən çox kommersiya gəmisinin blokada zonasından keçməsinə icazə verilib.
