Oktyabr ayı Rusiya ordusu üçün Ukraynada öldürülən və yaralanan hərbçilərin sayına görə yeni antirekordla başa çatıb. Rusiya qoşunları bir ay ərzində ümumilikdə təxminən 54 min nəfər itirib.
Azpost.info bildirir ki, bu barədə “Bloomberg” Avropa kəşfiyyat orqanlarının məlumatlarına istinadən xəbər yayıb.
Ukrayna Prezidenti Volodimir Zelenski bazar günü bir ay ərzində Rusiya ordusunun 54,4 min hərbçisinin öldürüldüyünü və ya yaralandığını açıqlayıb. “Bloomberg” yazır ki, Avropa rəsmilərinin qiymətləndirmələri də bu rəqəmlərə yaxındır. Eyni zamanda, ümumi itkilər arasında ölənlərin payı da rekord həddə çatıb.
“Bloomberg”in məlumatlarına görə, Kreml tərəfindən Donbasın nəyin bahasına olursa-olsun ələ keçirilməsi tapşırığı verilən Rusiya Baş Qərargahının generallarının rəhbərlik etdiyi qoşunlar orta hesabla həftədə 12 min, gündə 1,7 mindən çox, saatda isə 70-dən artıq hərbçi itirib.
Buna baxmayaraq, Rusiya ordusu oktyabrı ardıcıl ikinci ay ərazi itkisi ilə başa vurub. ABŞ-ın Müharibənin Öyrənilməsi İnstitutunun (ISW) qiymətləndirməsinə görə, Rusiya qüvvələrinin nəzarətində olan ərazilər oktyabrda təxminən 160 kvadratkilometr azalıb. Sentyabrda da Rusiya ordusunun nəzarət etdiyi ərazi 80,8 kvadratkilometr kiçilib.
Ukraynanın OSINT layihəsi DeepState-in məlumatlarına əsasən, Rusiya Silahlı Qüvvələri ilin yanvar-oktyabr aylarında Ukrayna ərazisinin 1000 kvadratkilometrindən də az hissəsini ələ keçirib. Bu, 2025-ci ilin eyni dövründə əldə edilən nəticədən təxminən 3,5 dəfə azdır.
“Bloomberg Intelligence” analitiki Aleks Kokçarovun qiymətləndirməsinə görə, Rusiya komandanlığı Ukraynanın hər yeni kvadratkilometr ərazisini ələ keçirmək üçün təxminən min hərbçisini qurban verməli olur.
Ekspert bildirir ki, Moskva hava zərbələri ilə Ukraynaya təzyiqi artırsa da, Rusiyanın döyüş meydanındakı imkanları, ehtimal ki, 2026-cı ilin sonunadək zəif qalacaq.
Müharibənin cari il üzrə ilk 10 ayının nəticələrinə görə, Ukrayna yanvarın 1-də nəzarətində olan ərazinin cəmi 0,2 faizini itirib. Bu, Rusiya generallarının həyata keçirdiyi çoxsaylı hücumlara baxmayaraq baş verib.
DeepState-in hesablamalarına görə, Rusiya ordusu oktyabr və sentyabr aylarında ay ərzində təxminən 7 min hücum əməliyyatı keçirib. Avqustda isə bu göstərici 8 minə yaxın olub. Bu, ötən ilin eyni dövrü ilə müqayisədə 18-30 faiz çoxdur.
“Bloomberg” vurğulayır ki, cəbhədəki itkilər Rusiya ordusuna müqavilə əsasında və könüllü şəkildə qoşulanların sayını üstələməkdə davam edir.
İqtisadçı Yanis Kluqenin hesablamalarına görə, ilin ilk yarısında Rusiyanın hərbi xidmətə cəlbetmə kampaniyası ayda təxminən 30 min nəfəri cəbhəyə göndərməyə imkan verib. Yanvar-avqust aylarında isə Müdafiə Nazirliyi ilə 234 min nəfər müqavilə imzalayıb. Bu, ötən ilin eyni dövrü ilə müqayisədə 10 faiz azdır.
Strateji və Beynəlxalq Araşdırmalar Mərkəzinin (CSIS) ekspertləri daha əvvəl hesablamışdılar ki, 2022-ci ilin fevralında müharibə başlayandan 2026-cı ilin iyun ayınadək Rusiya ordusunun ümumi itkiləri 1,4 milyon nəfərə çatıb. Bu rəqəmə ölənlər, ağır yaralananlar və itkin düşənlər daxildir.
CSIS-in məlumatına görə, Ukraynada həlak olan Rusiya hərbçilərinin sayı İkinci Dünya müharibəsindən sonra ABŞ-ın bütün müharibələrdə verdiyi ümumi ölüm itkilərindən dörd dəfədən çox, 1945-ci ildən sonra SSRİ və Rusiyanın digər müharibələrdəki ümumi ölüm itkilərindən isə doqquz dəfədən çoxdur.
“The Economist” nəşrinin hesablamalarına görə, oktyabrın sonuna Ukraynada həlak olan Rusiya hərbçilərinin sayı 770 min nəfərə çata bilərdi.
Bu rəqəm İjevsk, Barnaul və ya Tolyatti kimi şəhərlərin əhalisinin sayından çoxdur. Həmçinin Yakutsk və Bryansk şəhərlərinin birlikdə əhalisinin sayına yaxındır.
Nadir Talıblı
