Rusiyada bu həftəsonu keçiriləcək parlament seçkilərindən sonra yeni və genişmiqyaslı səfərbərlik elan edilə biləcəyi ilə bağlı narahatlıq artır.
“Bloomberg” yazır ki, Rusiyada bəzi insanlar prezident Vladimir Putinin seçkidən sonra Ukraynadakı müharibəyə göndərmək üçün yeni səfərbərlik elan edə biləcəyindən ehtiyat edirlər. Agentliyin məlumatına görə, bu narahatlıq hətta Kremlin əməkdaşları və hərbi komissarlıqlarda çalışan şəxslər arasında da yayılıb.
Bloomberg-in əldə etdiyi sənədlərə görə, son aylarda bəzi məmurlar xarici banklarda hesab açmağa və aktivlərini ölkə xaricinə çıxarmağa çalışıblar. Onların bir qisminin dost və qohumlarına Rusiyanı tərk etməyi tövsiyə etdiyi bildirilir.
Rusiyada Dövlət Dumasına seçkilər 18 sentyabrda başlayıb və üç gün davam edəcək. Səsvermə 20 sentyabrda başa çatacaq. Yeni səfərbərliklə bağlı narahatlıqlar da məhz seçkilərin yekunlaşmasından sonrakı dövrə yönəlib.
Bloomberg-in yazdığına görə, Rusiya ordusunun sıralarını doldurmaq üçün hər il təxminən 400 min nəfər cəlb etməyə ehtiyacı var. İndiyədək Moskva əsasən yüksək ödənişlər və müqaviləli hərbi xidmət üçün verilən bonuslar hesabına yeni şəxslərin cəlb edilməsinə üstünlük verib. Lakin müharibənin beşinci ilinə daxil olması fonunda könüllülərin sayının əvvəlki səviyyədə saxlanmasının çətinləşdiyinə dair əlamətlər yaranıb.
