ABŞ və Çin arasında yeni danışıqlar başlayıb. ABŞ-ın maliyyə naziri Skott Bessent və Çinin Baş nazir müavini He Lifeng Nyu-Yorkda bir araya gəliblər. Görüşün əsas məqsədi ABŞ Prezidenti Donald Tramp və Çin lideri Si Cinpin arasında bu həftə Vaşinqtonda keçiriləcək sammitə hazırlıqdır.
Reuters xəbər verir ki, danışıqlarda ABŞ-Çin ticarəti, tariflər, süni intellekt və kritik mineralların tədarükü əsas mövzular olacaq.
Görüş Nyu-Yorkda JPMorgan Chase bankının qərargahında keçirilir. ABŞ-ı danışıqlarda Bessentlə yanaşı, Ticarət nümayəndəsi Ceymison Qrir də təmsil edir.
Tərəflərin qarşısında duran əsas məsələlərdən biri noyabrın 10-da başa çatması nəzərdə tutulan ticarət atəşkəsinin uzadılmasıdır. ABŞ həmçinin Çinin nadir torpaq metalları və kritik mineralların tədarükündə kifayət qədər öhdəlik yerinə yetirmədiyini bildirir.
Reuters-in yazdığına görə, danışıqlardan böyük razılaşma deyil, münasibətlərin daha da gərginləşməsinin qarşısını alacaq kiçik razılaşmalar gözlənilir.
Tərəflər strateji əhəmiyyət daşımayan məhsullara tətbiq edilən tariflərin azaldılması, Çinin ABŞ-dan hər il əlavə 17 milyard dollarlıq kənd təsərrüfatı məhsulu alması və 200-dən çox “Boeing” təyyarəsinin alınması ilə bağlı məsələləri də müzakirə edə bilərlər.
Süni intellekt də danışıqların yeni istiqamətlərindən biridir. ABŞ və Çin qabaqcıl AI texnologiyalarının inkişafında əsas ölkələr hesab olunur. Vaşinqton güclü AI modellərinin təhlükəli aktorların əlinə keçməsinin qarşısını almaq üçün müəyyən “təhlükəsizlik çərçivələri” yaradılmasını istəyir.
Bessent bildirib ki, tərəflər həm açıq çəkili, həm də qapalı çəkili AI modellərini müzakirə edəcəklər.
ABŞ-Çin görüşü iki ölkə liderlərinin qarşıdakı sammitindən əvvəl mühüm hazırlıq mərhələsi hesab olunur.
