Gənc Psixoloqlar İctimai Birliyi tərəfindən həyata keçirilən “Müharibə iştirakçılarına psixoloji dəstəyin göstərilməsi” layihəsi uğurla yekunlaşıb.
Layihə çərçivəsində Xankəndi, Şuşa və Xocalı şəhərlərində müharibə iştirakçıları və müharibənin təsirinə məruz qalmış şəxslər üçün peşəkar psixoloqların iştirakı ilə qrup görüşləri, psixoloji maarifləndirmə və dəstək tədbirləri təşkil olunub. Ümumilikdə 100-dən çox iştirakçı psixoloji dəstək xidmətlərindən faydalanıb.
Görüşlər zamanı stressin idarə olunması, travmatik təcrübələrin psixoloji təsirləri, emosional gərginliyin azaldılması, psixoloji dayanıqlılığın gücləndirilməsi, ailə və sosial münasibətlər, eləcə də gündəlik həyata və sosial mühitə adaptasiya mövzularına xüsusi diqqət yetirilib.
Layihənin əsas məqsədi müharibənin psixoloji təsirlərinin azaldılmasına, iştirakçıların emosional rifahının və dayanıqlılığının gücləndirilməsinə, onların sosial həyata adaptasiyasının dəstəklənməsinə töhfə vermək olub.
Layihə Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilib.
