Ələt Azad İqtisadi Zonasının əsas üstünlüklərindən biri xüsusi qanunvericilik bazasıdır
Bunu Ələt Azad İqtisadi Zonası İdarə Heyətinin sədri Valeh Ələsgərov Bakıda keçirilən Azərbaycan Beynəlxalq İnvestisiya Forumunun (AIIF 2026) panel müzakirəsində çıxışı zamanı deyib.
O bildirib ki, Azərbaycanın əlverişli coğrafi mövqeyi Ələt Azad İqtisadi Zonasının əsas üstünlüklərindən biridir. Onun sözlərinə görə, zona şimal-cənub və şərq-qərb istiqamətlərində mühüm nəqliyyat marşrutlarının kəsişməsində yerləşir və investorlar üçün müxtəlif nəqliyyat-logistika imkanları təqdim edir.
Valeh Ələsgərov qeyd edib ki, Ələt Azad İqtisadi Zonasında dəmir yolu və digər nəqliyyat imkanları ilə yanaşı, yük hava limanının yaradılması da yüksək texnologiyalı sənaye sahələrinin cəlb edilməsinə imkan verəcək.
O vurğulayıb ki, Ələt Azad İqtisadi Zonasının investorlar üçün əsas üstünlüklərindən biri xüsusi qanunvericilik bazasıdır.
“Ələt Azad İqtisadi Zonasında xüsusi qanunvericilik tətbiq olunur. Bu, investorlar üçün qaydaların uzunmüddətli və sabit olmasını təmin edir. Heç kim üç, beş və ya on ildən sonra oyun qaydalarının dəyişdirilməsindən narahat olmamalıdır”, – Ələsgərov bildirib.
İdarə Heyətinin sədri qeyd edib ki, Ələt Azad İqtisadi Zonasında əsas məqsəd yüksək əlavə dəyər yaradan və məhsullarını əsasən xarici bazarlara ixrac edən şirkətləri cəlb etməkdir.
Onun sözlərinə görə, yaradılan xüsusi şərait Azərbaycanın kiçik və orta biznesinin maraqlarının qorunmasına, eyni zamanda ölkəyə yeni texnologiyaların və yüksək əlavə dəyər yaradan istehsal sahələrinin gətirilməsinə xidmət edir.
Ələsgərov əlavə edib ki, nəqliyyat-logistika infrastrukturu, xüsusi hüquqi rejim və investorların fəaliyyətinin qorunması Ələt Azad İqtisadi Zonasının Azərbaycanda yeni istehsal və ixrac imkanlarının formalaşdırılmasına töhfə verməsinə şərait yaradır.
