Konstitusiya Məhkəməsi Cinayət Məcəlləsində nəzərdə tutulan “mütəmadi döymə” anlayışına hüquqi aydınlıq gətirib.
Məhkəmə bildirib ki, bu anlayış müəyyən zaman kəsiyində üç dəfə və ya daha çox həyata keçirilən və güclü fiziki ağrı ilə nəticələnən hərəkətləri əhatə edə bilər.
Konstitusiya Məhkəməsinin Plenumunun növbəti iclası sədr Fərhad Abdullayevin rəhbərliyi ilə keçirilib.
Məhkəmənin mətbuat xidmətinin məlumatına görə, iclasda İnsan hüquqları üzrə müvəkkilin (ombudsmanın) sorğusu əsasında Cinayət Məcəlləsinin 133.1-ci maddəsinin Konstitusiyanın bir sıra müddəalarına uyğunluğunun yoxlanılması ilə bağlı konstitusiya işinə baxılıb.
İş üzrə hakim R.Quliyevin məruzəsi dinlənilib, Ombudsmanın sorğusu və Milli Məclis Aparatının mülahizəsi araşdırılıb. Həmçinin Ali Məhkəmə, Daxili İşlər Nazirliyi, Naxçıvan Muxtar Respublikasının Ədliyyə Nazirliyi, Hüquqi Ekspertiza və Qanunvericilik Təşəbbüsləri Mərkəzi və Vəkillər Kollegiyasının təqdim etdiyi mütəxəssis rəyləri nəzərdən keçirilib.
Konstitusiya Məhkəməsi Bakı Dövlət Universitetinin Hüquq fakültəsinin Cinayət hüququ və kriminologiya kafedrasının müdiri, hüquq elmləri doktoru, professor Ş.Səmədovanın və həmin kafedranın müəllimi V.Qədimovun ekspert rəylərini də araşdırıb.
“Mütəmadilik” necə müəyyənləşdiriləcək?
Plenum qərarında Cinayət Məcəlləsinin 133.1-ci maddəsindəki “mütəmadilik” anlayışının hüquqi məzmununu açıqlayıb.
Qərara əsasən, burada söhbət təqsirkarın vahid niyyəti ilə əhatə olunan, müəyyən zaman kəsiyində üç dəfə və ya daha çox həyata keçirilən, güclü fiziki ağrı ilə nəticələnən hərəkətlərdən gedir.
Bu hərəkətlər arasında daxili qarşılıqlı əlaqənin olması da “mütəmadilik” anlayışının əsas elementlərindən biri kimi müəyyən edilib.
Başqa sözlə, Konstitusiya Məhkəməsinin mövqeyinə görə, yalnız hərəkətlərin sayının çoxluğu deyil, onların eyni niyyət çərçivəsində və müəyyən zaman ərzində bir-biri ilə əlaqəli şəkildə həyata keçirilməsi də hüquqi qiymətləndirmə baxımından əhəmiyyət daşıyır.
Cinayət Məcəlləsinin 133.1-ci maddəsinə münasibət
Konstitusiya Məhkəməsi Plenumu Cinayət Məcəlləsinin 133.1-ci maddəsinin Konstitusiyanın 24-cü maddəsinin I hissəsinə, 26-cı maddəsinə, 28-ci maddəsinin I hissəsinə, 32-ci maddəsinin I hissəsinə, 60-cı maddəsinə və 71-ci maddəsinin I və II hissələrinə zidd olmadığı qənaətinə gəlib.
Məhkəmə bu nəticəyə Cinayət Məcəlləsində təsbit olunmuş qanunçuluq prinsipinin tələblərini və əvvəlki hüquqi mövqelərini nəzərə alaraq gəlib.
Qərar dərc edildiyi gündən qüvvəyə minir. Sənəd qətidir və heç bir orqan və ya şəxs tərəfindən ləğv edilə, dəyişdirilə və ya rəsmi şəkildə təfsir edilə bilməz.
