ABŞ Kubaya qarşı sanksiyaları yenidən sərtləşdirib. Vaşinqton ada dövləti və onun özəl sektoru ilə maliyyə əməliyyatlarına əlavə məhdudiyyətlər tətbiq edib.
Bu barədə ABŞ Maliyyə Nazirliyinin mətbuat xidməti məlumat yayıb.
ABŞ hakimiyyəti Kuba təhlükəsizlik strukturları və Grupo de Administración Empresarial S.A. konqlomeratı ilə əlaqəli Kuba təşkilatları ilə maliyyə əməliyyatlarını qadağan edib.
ABŞ Maliyyə Nazirliyi həmçinin 2024-cü ildən qüvvədə olan ümumi lisenziyanı ləğv edib. Həmin sənəd ABŞ banklarına müəyyən şərtlərlə Kuba ilə bağlı dollar ödənişlərini həyata keçirməyə imkan verirdi. Bunun üçün ödənişin göndəricisi və alıcısı ABŞ hüdudlarından kənarda olmalı, əməliyyat isə ABŞ vətəndaşlarının maraqlarına toxunmamalı idi.
Bundan başqa, ABŞ banklarına Kuba vətəndaşı olan müstəqil sahibkarların hesablarını açmağa və idarə etməyə imkan verən icazə də ləğv olunub.
Kuba özəl sektorunun nümayəndələrinin ABŞ bank sisteminə çıxışına 2024-cü ildə, Co Bayden administrasiyası dövründə icazə verilmişdi. Bu addım Kubada özəl sahibkarlığı dəstəkləməyə yönəlmiş tədbirlər çərçivəsində atılmışdı.
Yeni məhdudiyyətlər Kubaya səfərlərin bəzi kateqoriyalarına da şamil edilib. Bunlar Barak Obama administrasiyası dövründə icazə verilən müəyyən səfər növləridir.
Belə ki, ABŞ vətəndaşları Kubada bəzi mədəni mübadilə proqramlarında iştirak etmək, konfranslara və peşəkar görüşlərə qatılmaq üçün bundan sonra Amerika hakimiyyətindən əvvəlcədən icazə almalı olacaqlar.
