ABŞ-da ölkənin rəqiblərinin texnoloji inkişafının qarşısını almaq üçün hərbçilərə və kəşfiyyat orqanlarına kömək etməli olan xüsusi bölmə yaradılıb.
Bu barədə Politico nəşri hazırkı və keçmiş amerikalı rəsmilərə istinadən yazıb.
Nəşrin məlumatına görə, Texnoloji Dəstək İdarəsi (Technology Support Office — TSO) apreldə Pentaqonda fəaliyyətə başlayıb. Onun tərkibinə 2023-cü ildən fəaliyyət göstərən iki məxfi kəşfiyyat proqramı daxil edilib.
TSO əməkdaşlarına müstəqil şəkildə gizli əməliyyatlar keçirmək səlahiyyəti verilməyib. Onların vəzifəsi hərbi və kəşfiyyat bölmələri üçün zəruri vasitələr hazırlamaq və əməliyyat planları tərtib etməkdən ibarətdir.
ABŞ kəşfiyyatının keçmiş əməkdaşlarından biri *Politico*ya bildirib ki, idarənin əsas məqsədi ölkənin rəqiblərinin yeni texnologiyalar əldə etməsinə mane olmaq və həmin texnologiyaların tətbiqini ləngitməkdir.
Nəşrin məlumatına görə, TSO mütəxəssisləri kompüter sistemlərini sındırmaq üçün vasitələr hazırlayırlar. Onlar, həmçinin xarici ölkələrin hərbi texnikasına nasaz komponentlərin aldadıcı yollarla yerləşdirilməsi üsullarını araşdırırlar.
Pentaqon yayılan məlumatların doğruluğunu şübhə altına alıb. Qurumun mətbuat katibinin müavini Ceykob Bliss jurnalistlərin sorğusuna əsas olan məlumatların həqiqətə uyğun olmadığını bildirib.
*Politico*nun məlumatına görə, idarənin yaradılmasını Pentaqon rəhbərinin müavini Stiv Faynberq dəstəkləyib. Bu işə əvvəllər Mərkəzi Kəşfiyyat İdarəsində (CIA) xidmət etmiş onun baş müşaviri Tom Rakusan da cəlb olunub.
Daha əvvəl The Washington Post qəzeti Rakusanın ABŞ-ın rəqiblərinə qarşı iqtisadi mübarizəni nəzərdə tutan başqa bir kəşfiyyat proqramının hazırlanmasında da iştirak etdiyini yazmışdı. Ehtimala görə, həmin proqramın iştirakçıları sahibkar adı altında fəaliyyət göstərəcəklər.
ABŞ-ın hərbi qurumu isə belə bir layihənin mövcudluğunu təkzib edir.
