Azərbaycanda sosial ödənişlərin artırılmasını nəzərdə tutan altıncı sosial islahat paketi hazırlanır. Yeni paketin hansı ödənişləri əhatə edəcəyi və artımların nə vaxt həyata keçiriləcəyi hələ açıqlanmayıb.
Azpost.info APA-ya istinadən xəbər verir ki, bunu əmək və əhalinin sosial müdafiəsi naziri Anar Əliyev Xankəndidə keçirilən “SOCGOV 2026: Ağıllı idarəetmə üçün rəqəmsal təhlil” mövzusunda beynəlxalq forumda çıxışı zamanı bildirib.
Nazirin sözlərinə görə, 2018-ci ildən indiyədək Azərbaycanda beş sosial islahat paketi icra olunub. Bu paketlərin həyata keçirilməsi üçün illik əlavə maliyyə vəsaitinin həcmi 8 milyard manat təşkil edir.
Yeni sosial islahat paketinin hazırlanması sosial ödənişlərin artırılması istiqamətində növbəti mərhələ kimi qiymətləndirilir. Bununla belə, pensiyaların, müavinətlərin və digər sosial ödənişlərin hansı həcmdə artırılacağı barədə hələlik konkret rəqəmlər açıqlanmayıb.
Anar Əliyev çıxışında şəhid ailələrinə və müharibə iştirakçılarına göstərilən sosial dəstək tədbirlərinə də toxunub. O, forumun Vətən müharibəsində qazanılmış Zəfərin altıncı ildönümü ərəfəsində keçirildiyini diqqətə çatdırıb.
Nazir “SOCGOV 2026” forumunun Xankəndidə təşkil olunmasının simvolik əhəmiyyətini vurğulayıb. Onun sözlərinə görə, tədbir azad edilmiş ərazilərdə qurulan yeni həyatın və ağıllı şəhər konsepsiyasının təqdimatı baxımından da mühüm əhəmiyyət daşıyır.
Forumda sosial xidmətlərin elektronlaşdırılması, əlilliyin qiymətləndirilməsi, məşğulluq xidmətlərinin təkmilləşdirilməsi və inzibati proseslərin avtomatlaşdırılması istiqamətində görülən işlər barədə də məlumat verilib.
Bildirilib ki, DOST mərkəzlərində göstərilən xidmətlərin 90 faizdən çoxu elektronlaşdırılıb. Sosial islahatların nəticələri beynəlxalq səviyyədə də yüksək qiymətləndirilib və bu sahədə əldə olunan uğurlar 300-dən çox beynəlxalq mükafat və sertifikatla təltif olunub.
Altıncı sosial islahat paketinin detalları, o cümlədən artımların hansı sosial ödənişlərə şamil ediləcəyi və tətbiq müddəti barədə əlavə məlumatın açıqlanması gözlənilir.
Samir Abdulla
