Tramp üçüncü dəfə prezidentliyə namizəd olmaq istəyir? ABŞ liderindən gözlənilməz açıqlama
ABŞ prezidenti Donald Tramp 2020-ci il prezident seçkilərinin saxtalaşdırıldığını iddia edərək üçüncü prezidentlik müddəti üçün namizədliyini irəli sürmək hüququnun olduğunu bildirib.
Azpost.info bildirir ki, bu barədə CNN məlumat yayıb.
Ayova ştatının sakinləri qarşısında çıxış edən ABŞ lideri Konstitusiyanın ona yenidən prezidentliyə namizəd olmağa icazə vermədiyini etiraf edib. Trampın sözlərinə görə, o, qanunun müvafiq müddəalarını araşdırıb, lakin onların dəqiq şərhinə tam əmin deyil. “Düşünürəm ki, qanunda belə deyilir — buna 100 faiz əmin deyiləm, amma məncə, qanun yenidən namizəd olmağıma icazə vermir. Mən həmin ifadəni araşdırmışam”, – deyə Tramp bildirib.
Lakin cəmi bir neçə dəqiqə sonra ABŞ prezidenti dördüncü dəfə namizəd olmaq ehtimalından danışıb. O, bu fikirlərini nəticələrini hələ də mübahisələndirdiyi 2020-ci il prezident seçkiləri ilə əlaqələndirib. Tramp həmin vaxt səsvermənin nəticələrinin saxtalaşdırıldığını və qələbəsinin əlindən alındığını iddia edib. O, mövqeyini əsaslandırmaq üçün komandasının seçkilərdə çox yaxşı nəticələr göstərdiyini də bildirib.
Qeyd edək ki, ABŞ Konstitusiyasına edilən 22-ci düzəlişə əsasən, heç kim iki dəfədən artıq prezident seçilə bilməz. Trampın 2020-ci il seçkiləri ilə bağlı iddiaları isə onun üçün əlavə prezidentlik müddətinə avtomatik hüquq yaratmır.
