İranın ali lideri ayətullah Müctəba Xamenei çərşənbə axşamı Tehranda İran Ali Milli Təhlükəsizlik Şurasının katibi, general-mayor Möhsün Rzai ilə görüşüb.
Bu barədə Mehr agentliyi məlumat yayıb.
O, dövlət qurumlarını müharibənin başa çatdırılması və “nə müharibə, nə də sülh” vəziyyətindən çıxmaq üçün Tehranın şərtlərinin yerinə yetirilməsinə nail olmağa çağırıb.
Xameneinin sözlərinə görə, İran milli hüquq və maraqlarını, eləcə də “Müqavimət cəbhəsi” adlandırılan qüvvələrin maraqlarını ardıcıl şəkildə müdafiə etməlidir. Müharibənin başa çatması üçün İran rəsmilərinin daha əvvəl irəli sürdüyü şərtlərin yerinə yetirilməsinə nail olmaq lazımdır.
Görüşdə Ali Milli Təhlükəsizlik Şurasının və onun katibliyinin roluna da xüsusi diqqət yetirilib. Xamenei bu qurumu dövlət siyasətinin formalaşdırılmasında əsas mərkəzlərdən biri adlandırıb.
Müzakirə olunan digər məsələlər arasında milli birliyin möhkəmləndirilməsi, əhali ilə hakimiyyət arasında qarşılıqlı etimadın artırılması və ölkə konstitusiyasında nəzərdə tutulan imkanlardan istifadə edilməsi olub.
Xamenei xüsusilə konstitusiyanın Ali Milli Təhlükəsizlik Şurasının fəaliyyətini tənzimləyən 176-cı maddəsinə diqqət çəkib. Onun sözlərinə görə, bu müddəa dövlət problemlərinin həllində prezidentə və icra hakimiyyəti orqanlarına dəstək göstərmək üçün vasitələrdən biridir.
Bundan başqa, görüşdə milli və regional təhlükəsizliyin təmin edilməsi, Hörmüz boğazının idarə olunması, eləcə də qonşu ölkələrlə davamlı və qarşılıqlı faydalı maraqlar əsasında münasibətlərin inkişaf etdirilməsi məsələləri müzakirə olunub.
Möhsün Rzai isə öz növbəsində İranın müxtəlif sahələrindəki vəziyyət və mövcud problemlərin həlli istiqamətində görülən tədbirlər barədə məruzə təqdim edib.
