Rusiya Prezidenti Vladimir Putin Finlandiya Prezidenti Aleksandr Stubb və Norveçin Baş naziri Yonas Qahr Støre ilə söhbəti zamanı Ukrayna Prezidenti Volodimir Zelenskinin Moskvaya gələ biləcəyini təsdiqləyib.
Kremlin nümayəndəsi Yuri Uşakov “Vesti” informasiya xidmətinə açıqlamasında bildirib ki, Stubb və Støre Zelenskinin Putinlə birbaşa danışmaq istəyini Rusiya liderinə çatdırıblar.
“Rəhbərimiz bir daha bildirib ki, Zelenski həqiqətən birbaşa danışıqlar aparmaq istəyirsə, Moskvaya gəlsin. Burada onun üçün bütün lazımi şərait, o cümlədən təhlükəsizlik təmin ediləcək”, – deyə Uşakov bildirib.
Uşakov vurğulayıb ki, Rusiya və Ukrayna liderlərinin görüşü danışıqlar başa çatdıqdan sonra məqsədəuyğun olardı. Onun sözlərinə görə, həmin vaxta qədər tərəflər münaqişənin uzunmüddətli həlli ilə bağlı sənədləri hazırlamalıdırlar.
Bundan əvvəl Aleksandr Stubb Ukraynadakı münaqişəyə son qoymaq üçün Rusiya ilə birbaşa dialoqun zəruri olduğunu etiraf edib.
Söhbət zamanı tərəflər noyabrın birinci yarısında Rusiya, Ukrayna və ABŞ arasında üçtərəfli danışıqların bərpası barədə əldə olunmuş razılaşmanı da alqışlayıblar.
