Azərbaycan Respublikasının QHT-lərə Dövlət Dəstəyi Agentliyinin maliyyə yardımı ilə Azərbaycan Respublikası Təhsil Cəmiyyəti İctimai Birliyi tərəfindən həyata keçirilən “Məktəb-Valideyn Tərəfdaşlığı” İnkişaf Platforması layihəsi çərçivəsində 28 oktyabr 2026-cı il tarixində “Abdulla Rəhimov adına 247 nömrəli tam orta məktəb” PHŞ-də maarifləndirici tədbir keçirilib.
Tədbirdə məktəbin direktoru Sitarə Abbasova, Azərbaycan Respublikası Təhsil Cəmiyyəti İctimai Birliyinin sədri Murad Ağalarov, “Məktəb Guşəsi” jurnalının baş redaktoru Məzahir Məmmədli, məktəbin rəhbər heyəti, müəllimlər və valideynlər iştirak ediblər.
Tədbirin əvvəlində məktəbin direktoru Sitarə Abbasova çıxış edərək məktəb-valideyn əməkdaşlığının şagirdlərin təlim-tərbiyəsində və fərdi inkişafında mühüm rol oynadığını qeyd edib. O, valideynlərin təhsil prosesində fəal iştirakının, müəllimlərlə müntəzəm ünsiyyətin və qarşılıqlı etimadın məktəb mühitinin inkişafına müsbət təsir göstərdiyini vurğulayıb.
Daha sonra Təhsil Cəmiyyəti İctimai Birliyinin sədri Murad Ağalarov layihənin məqsədləri, əsas fəaliyyət istiqamətləri və gözlənilən nəticələri barədə məlumat verib. O bildirib ki, məktəb və ailə arasında səmərəli tərəfdaşlığın qurulması uşaqların yalnız akademik nailiyyətləri deyil, eyni zamanda sosial bacarıqları, mənəvi dəyərləri və şəxsiyyət kimi formalaşması baxımından da əhəmiyyətlidir. Murad Ağalarov müəllim və valideynlərin ortaq məqsəd ətrafında birləşməsinin, uşaqların inkişafı ilə bağlı məsələlərdə birgə məsuliyyət daşımasının vacibliyini diqqətə çatdırıb.
“Məktəb Guşəsi” jurnalının baş redaktoru Məzahir Məmmədli də çıxışında məktəb, ailə və cəmiyyət arasında əməkdaşlığın gücləndirilməsinin əhəmiyyətindən bəhs edib.
Tədbirin növbəti hissəsində təlimçilər tərəfindən məktəb-valideyn münasibətlərinin müxtəlif aspektlərini əhatə edən təqdimatlar keçirilib.
Təlimçi Aysel Nağıyeva “Effektiv ünsiyyət zənciri: Müəllim-valideyn tərəfdaşlığı” mövzusunda çıxış edərək müəllim və valideynlər arasında sağlam ünsiyyətin qurulması, qarşılıqlı anlaşmanın gücləndirilməsi və yaranan problemlərin konstruktiv dialoq yolu ilə həlli məsələlərini diqqətə çatdırıb.
Təlimçi Aynur İskəndərova “Ortaq qərar, ortaq məsuliyyət: Tərəfdaşlıqda müəllim-valideyn rolları” mövzusunda təqdimatında uşaqların təhsil və tərbiyəsində müəllimlərin və valideynlərin məsuliyyət bölgüsünü, birgə qərarvermənin əhəmiyyətini və əməkdaşlığın praktik mexanizmlərini izah edib.
Təlimçi Ceyhun Qəşəm isə “Uşaqlarımızın dünyasını kim formalaşdırır? Ailə-Məktəb-Sosial media” mövzusunda çıxış edərək uşaqların dünyagörüşünün formalaşmasında ailənin, məktəbin və sosial medianın roluna, rəqəmsal mühitin uşaqlara təsirinə və bu sahədə valideyn-məktəb əməkdaşlığının vacibliyinə toxunub.
Tədbir çərçivəsində iştirakçılar məktəb və ailə arasında tərəfdaşlığın gücləndirilməsi, valideynlərin təhsil prosesində iştirakının artırılması və uşaqların inkişafına dəstək verən sağlam ünsiyyət mühitinin formalaşdırılması ilə bağlı məsələlər ətrafında fikir mübadiləsi aparıblar.
Qeyd edək ki, “Məktəb-Valideyn Tərəfdaşlığı” İnkişaf Platforması layihəsi məktəb və ailə arasında əməkdaşlıq münasibətlərinin inkişaf etdirilməsini, valideynlərin maarifləndirilməsini, müəllim-valideyn ünsiyyətinin təkmilləşdirilməsini və uşaqların hərtərəfli inkişafına dəstək verilməsini hədəfləyir.
Layihə Azərbaycan Respublikasının QHT-lərə Dövlət Dəstəyi Agentliyinin maliyyə yardımı ilə Azərbaycan Respublikası Təhsil Cəmiyyəti İctimai Birliyi tərəfindən həyata keçirilir.
