ABŞ Prezidenti Donald Tramp Azərbaycan Prezidenti İlham Əliyevi 2026-cı ilin dekabrında Mayamidə keçiriləcək G20 Liderlər Sammitinə dəvət edib.
Azpost.info bildirir ki, sammit dekabrın 14-15-də ABŞ-ın Florida ştatının Mayami şəhərində təşkil olunacaq. ABŞ Dövlət Departamentinin oktyabrın 28-də yaydığı məlumata görə, tədbirə Prezident Donald Tramp ev sahibliyi edəcək.
Azərbaycanın sammitə dəvət edilməsi barədə məlumat hələ iyulun 7-də yayılıb. Azərbaycan ABŞ-ın G20 sədrliyinin rəsmi saytında dəvət olunan ölkələr sırasında göstərilib. Həmin siyahıda Qazaxıstan, Özbəkistan, Qətər, Sinqapur, İspaniya, Niderland, Norveç və digər dövlətlər də yer alıb.
İyulun 6-da yayılan digər məlumatda isə Qırğızıstanın ABŞ-dakı səfiri Aibek Moldogaziyev bildirib ki, Donald Tramp Azərbaycan, Qazaxıstan və Özbəkistan prezidentlərini sammitə şəxsi qonaq qismində dəvət edib.
Avqustun 8-də Azərbaycan Prezidenti İlham Əliyev Donald Trampla telefon danışığı zamanı G20 sammitinə dəvətə görə ABŞ Prezidentinə təşəkkür edib. İlham Əliyev bu dəvəti ABŞ-ın Azərbaycana müsbət münasibətinin təzahürü kimi qiymətləndirib.
Qeyd edək ki, G20 dünyanın aparıcı iqtisadiyyatlarını bir araya gətirən beynəlxalq platformadır. Sammitdə qlobal iqtisadiyyat, maliyyə sabitliyi, beynəlxalq ticarət və digər mühüm məsələlər müzakirə olunur.
