İki aylıq nisbi sakitlikdən sonra Yaxın Şərqdə vəziyyət yenidən gərginləşib. Bir gün əvvəl İran pilotsuz uçuş aparatları ilə Bəhreyndəki ABŞ hərbi bazasına hücum edib, ABŞ isə regiona üçüncü aviadaşıyıcısını göndərib. Tehran qabaqlayıcı zərbə endirməklə açıq şəkildə hədələyir.
Ötən həftə müharibənin “demək olar ki, başa çatdığını” elan edən Donald Trampın bundan sonrakı addımları üçün üç variantı var.
Azpost.info bildirir ki, bu barədə Bild nəşri yazır.
Birinci ssenari – hücumların yenidən başlanması.
The New York Times qəzetinin məlumatına görə, ABŞ və İsrail İranın enerji infrastrukturuna və iqtisadi obyektlərinə yeni hücumlar etmək imkanını nəzərdən keçirirlər. Axios-un məlumatına əsasən, İsrailin baş naziri Benyamin Netanyahu da zərbələrin bərpa olunmasında israr edir.
İkinci ssenari – diplomatik təzyiq.
Cümə axşamı Tramp Çinin Şençjen şəhərində Si Cinpin və Vladimir Putinlə görüşəcək. KİV-in məlumatına görə, ABŞ prezidenti onlarla İran müharibəsini müzakirə etmək niyyətindədir.
ABŞ-ın regiondakı hərbi mövcudluğu İran neftinin ən böyük alıcısı olan Çinə təzyiq göstərmək üçün əlavə vasitəyə çevrilə bilər.
Üçüncü ssenari – dəniz blokadasının davam etdirilməsi.
ABŞ-ın dövlət katibi Marko Rubio hesab edir ki, Tehrana qarşı iqtisadi təzyiq artıq o qədər güclüdür ki, yeni hərbi zərbələrə ehtiyac qalmaya bilər.
Bununla yanaşı, diplomatik yolla nizamlanma ehtimalı da qalır. Noyabrın 17-də İranın xarici işlər naziri Vaşinqtonla Tehran arasında vasitəçilik edən Omana səfər edəcək.
Nadir Talıblı
