Qətl
Şəmkir rayonunun Varlı Həyat kəndində iki nəfərin ölümü ilə nəticələnən hadisənin bəzi təfərrüatları məlum olub.
APA-nın məlumatına görə, ilkin araşdırmalar hadisənin qətl və intihar olduğunu göstərir.
Məlumata əsasən, 1968-ci il təvəllüdlü R. Mustafayevlə onunla birgə yaşayan, 1986-cı il təvəllüdlü Y. Süleymanova arasında mübahisə yaranıb. Mübahisə zamanı kişi qadının başına küt alətlə zərbələr endirib. Qadın aldığı xəsarətlərdən hadisə yerində ölüb.
Bundan sonra R. Mustafayev kəsici alətlə özünə xəsarət yetirib və o da hadisə yerində həyatını itirib.
Qeyd edək ki, hadisə barədə ilkin məlumatda evdən kişi və qadın meyitlərinin tapıldığı bildirilirdi. Kişinin gün ərzində kənddə görünməməsi və telefon zənglərinə cavab verməməsi yaxınlarını narahat edib. Onlar evin qapısının bağlı olduğunu görərək hasardan həyətə daxil olub və meyitləri aşkar ediblər.
Mərhumun yaxınlarının APA-ya bildirdiyinə görə, R. Mustafayev kənddə əkinçiliklə məşğul olub. Qadının isə onun yanında işlədiyi bildirilir. Kişinin bir neçə il əvvəl ailəsindən ayrıldığı və övladının olduğu qeyd edilir.
Faktla bağlı Şəmkir Rayon Prokurorluğunda araşdırma aparılır.
