Ukraynanın xarici işlər naziri Dmitri Kuleba qapalı qapılar arxasında Qərb tərəfdaşlarından “Patriot” hava hücumundan müdafiə sistemlərini Kiyevə icarəyə vermələrini xahiş etdiyini açıqlayıb.
Azpost.info bildirir ki, bu barədə Kuleba Ukraynanın TSN telekanalına müsahibəsində deyib.
“Biz bağlı qapılar arxasında oturanda mən tərəfdaşlarıma deyirəm: “Əzizlərim, nə istəsəniz edək. İcarəyə vermək istəyirsənsə, kreditlə alaq. Sərhədinizin bağlanmasını istəyirsinizsə, gəlin bunu edək. Amma Ukraynaya “Patriot” verin”- deyə Kuleba müsahibəsində vurğulayıb.
Qərbin bu şərtlər altında HHM sistemləri ilə təmin edilməsinə razı olub-olmaması ilə bağlı sualına cavabda Kuleba etiraf edib ki, qərar hələ təsdiqlənməyib.
O, aydınlaşdırıb ki, Ukrayna hazırda iki “Patriot” sistemi və bir SAMP-T-nin verilməsi ilə bağlı danışıqlar aparır. Kulebanın sözlərinə görə, bu gün hava hücumundan müdafiə sistemləri mövzusu ən problemli məsələdir.
Rusiya hesab edir ki, Ukraynaya silah tədarükü nizamlanmaya mane olur, NATO ölkələrini birbaşa münaqişəyə cəlb edir və “atəşlə oynayır”.
