ABŞ prezidenti Co Bayden Səudiyyə Ərəbistanına səfəri zamanı Ukraynadakı müharibə fonunda regionda ərzaq təhlükəsizliyini təmin etmək üçün Afrika və Yaxın Şərq ölkələrinə 1 milyard dollar ayrılacağını elan edəcək.
Azpost.info xəbər verir ki, bu barədə “Bloomberg” Ağ Evin yüksək rütbəli rəsmisinə istinadən məlumat veriblər.
Baydenin bu bəyanatı Körfəz Əməkdaşlıq Şurasının sammitində verəcəyi gözlənilir. Bundan başqa, Bəhreyn, Qətər, Küveyt, Oman, Birləşmiş Ərəb Əmirlikləri və Səudiyyə Ərəbistanı liderləri növbəti iki il ərzində ABŞ-ın rəhbərlik etdiyi “Qlobal İnfrastruktur və İnvestisiya üzrə Tərəfdaşlıq” təşəbbüsü ilə bağlı layihələrə 3 milyard dollar ayıracaq.
Beynəlxalq humanitar təşkilatlar dəfələrlə xəbərdarlıq ediblər ki, Ukraynadakı müharibə və Ukrayna limanlarında taxıl daşıyan gəmilərin blokadaya alınması yoxsul ölkələrdə, ilk növbədə Afrikanın şimalında aclıq problemini daha da dərinləşdirə bilər. Dünya taxıl ixracının təxminən 30 faizi Rusiya və Ukraynanın payına düşür. “Ukraynadan buğda ixracı bərpa olunmasa, Afrika qitədə sabitliyi poza biləcək çox ciddi qıtlıq vəziyyətində qalacaq”, – Seneqal lideri və Afrika İttifaqının prezidenti Maki Sal xəbərdarlıq edib.
Azpost.info
