ABŞ-ın keçmiş prezidenti Barak Obama Donald Trampın Vaşinqtonda həyata keçirdiyi təmir layihələrini istehza ilə tənqid edib. O bildirib ki, hazırkı prezident amerikalıları narahat edən problemlərdən daha çox Ağ Evin yenidən qurulması ilə maraqlanır.
“The Hill” nəşrinin yazdığına görə, Obama bu fikirləri Ohayo ştatının Klivlend şəhərində keçirilən seçkiqabağı tədbirdə səsləndirib. O, tədbirdə Demokratlar Partiyasından namizədlər Emi Ekton və Şerrod Braunu dəstəkləyib.
“Görünür, o, evin təmiri ilə çox maraqlanır. Əslində, HGTV telekanalında veriliş aparmalı idi”, – deyə Obama zarafat edib. O, evlərin təmiri və interyer dizaynına həsr olunan Amerika telekanalını nəzərdə tutub.
Keçmiş prezident Ağ Evdə aparılan genişmiqyaslı tikinti işlərini də tənqid edib. KİV-in məlumatına görə, bu layihələrin dəyəri 900 milyon dolları ötür.
“Bu qızıl nədir belə? Ağ Ev indi elə görünür ki, sanki Səddam Hüseyn orada The Cheesecake Factory restoranı açıb”, – Obama bildirib.
The Cheesecake Factory ABŞ-da məşhur restoran şəbəkəsidir. Şəbəkə yalnız desertləri ilə deyil, həm də böyük məkanları və dəbdəbəli, müxtəlif üslubları birləşdirən interyerləri ilə tanınır. Obama Ağ Evi bu restoranla müqayisə etməklə Trampın qızılı dekorasiyaya və dəbdəbəli tərtibata üstünlük verməsini ələ salıb.
Bu, Obamanın prezident iqamətgahında aparılan yenilənmə işlərini ilk dəfə tənqid etməsi deyil. O, daha əvvəl HBO Max platformasında Larri Devidin şousunda iştirak edərkən Ağ Evin interyerindəki qızılı bəzəkləri də tənqid etmişdi.
Keçmiş prezident Trampın digər layihələrini də diqqətdən kənarda qoymayıb. Obama Respublikaçı siyasətçinin 2016-cı il seçkiqabağı kampaniyasında səsləndirdiyi “bataqlığı qurutmaq” şüarını xatırladıb. Tramp həmin ifadə ilə Vaşinqtonun siyasi elitasını dəyişəcəyinə söz vermişdi.
Obama bu şüarı Linkoln memorialının yaxınlığındakı əks etdirici hovuzun təmiri ilə əlaqələndirib.
Yenilənmə işlərindən sonra hovuzun suyunda yaşıl yosunlar müşahidə olunub, ABŞ bayrağının rənglərinə uyğun çəkilmiş yeni boya isə qopmağa başlayıb. Layihə obyektə zərər vurulduğu barədə ittihamlar fonunda məhkəmə mübahisəsi ilə də müşayiət olunub.
Cümə günü Tramp hovuzun yenidən su ilə doldurulması prosesinin 85 faiz tamamlandığını bildirib.
“Bataqlığı qurutmaq barədə deyilənləri xatırlayırsınız? Əslində qurudulan yeganə şey Milli Mall ərazisindəki əks etdirici hovuz oldu. O da hansısa müsabiqəsiz müqavilə çərçivəsində korlandıqdan sonra”, – deyə Obama bildirib.
