ABŞ Prezidentinin xüsusi nümayəndəsi Stiv Uitkoff Ukraynada müharibənin başa çatdırılması ilə bağlı Amerikanın təkliflərini əks etdirən sənədi Rusiya Prezidenti Vladimir Putinə təqdim edib.
Bu barədə RBC-Ukrayna məlumat yayıb.
Ukrayna Prezidenti Volodimir Zelenski “TSN. Nedelya” proqramının aparıcısı Alla Mazura müsahibəsində bildirib ki, sənəddə Ukraynanın neytral statusu, ordusunun say tərkibi, ərazilər və təhlükəsizlik zəmanətləri kimi məsələlər əksini tapıb.
Zelenskinin sözlərinə görə, Kiyev həm Ukrayna ordusunun sayının məhdudlaşdırılması, həm də ölkəyə neytral status verilməsi tələbini qəbuledilməz hesab edir. Bununla belə, o, Vaşinqtonla əldə olunmuş razılaşmaları əsas gətirərək, Amerikanın hazırladığı təkliflərin bütün detallarını açıqlamayıb.
Ukrayna Prezidenti vurğulayıb ki, ölkəsinin təhlükəsizlik zəmanətləri Rusiya tərəfinin müəyyənləşdirdiyi şərtlər əsasında formalaşdırıla bilməz. Onun sözlərinə görə, ərazi məsələsi Kiyev üçün prinsipial əhəmiyyət daşıyır və yalnız dövlət başçıları səviyyəsində müzakirə oluna bilər.
“Ukrayna heç nəyi dəyişdirmək niyyətində deyil, lakin müzakirələrə hazırıq”, – Zelenski bildirib.
O əlavə edib ki, Amerika tərəfi ərazi məsələsində Kiyevin hansı güzəştlərə getməyə hazır olduğunu mütəmadi olaraq gündəmə gətirir.
Təhlükəsizlik zəmanətləri və Ukraynanın NATO ilə münasibətlərinin gələcəyi də daxil olmaqla, mümkün razılaşmanın digər aspektləri texniki qruplar səviyyəsində müzakirə edilə bilər. Zelenskinin sözlərinə görə, təhlükəsizlik zəmanətləri bu zəmanətləri verməyə hazır olan dövlətlərin konkret öhdəliklərini nəzərdə tutur. Kiyev prosesdə ABŞ və Avropa ölkələrinin iştirakına ümid edir.
Ukrayna Prezidenti eyni zamanda vurğulayıb ki, Uitkoffun Putinə təqdim etdiyi sənəd Rusiyanın təsdiqləməli olduğu hazır sülh planı deyil. “Qərarı Rusiya vermir. Bütün tərəflər qərar qəbul edir. Müzakirə üçün təkliflər var, o cümlədən ABŞ tərəfindən irəli sürülən təkliflər. Onlar bu təklifləri bizimlə müzakirə edirlər”, – Zelenski izah edib.
