Tramp
ABŞ administrasiyasının rəsmiləri Ukraynada 30 günlük atəşkəs təklifini müzakirə etmək üçün Rusiyaya yola düşüb.
AzPost bildirir ki, bu barədə ABŞ prezidenti Donald Tramp bildirib.
O, hərbi əməliyyatların mümkün dayandırılması ilə bağlı “müsbət siqnallar” aldığını, lakin hər şeyin Rusiyadan asılı olduğunu deyib.
Donald Tramp Ağ Evdə jurnalistlərə deyib: “Bizim nümayəndələr hazırda Rusiyaya yola düşür. Biz atəşkəs əldə edə biləcəyimizə ümid edirik”.
Onun sözlərinə görə, ABŞ sülh yolu ilə nizamlanmanı müzakirə edərkən təzyiq göstərə bilər. Eyni zamanda, o, “buna ehtiyac olmayacağına” ümid etdiyini bildirib.
“Əlimizdə Ukraynada atəşkəs razılaşmasının yarısı var, indi Rusiyanın buna razı olması qalır” –deyə Tramp vurğulayıb.
Amerika və Ukrayna nümayəndə heyətləri arasında bir gün əvvəl Səudiyyə Ərəbistanında keçirilən danışıqlardan sonra Ukrayna 30 günlük atəşkəs rejiminin uzadılma ehtimalı ilə tətbiqinə razılıq verib. Vaşinqton bu təklifi “müxtəlif kanallar” vasitəsilə Moskvaya çatdıracağına söz verib. ABŞ prezidenti Donald Tramp Amerika nümayəndə heyətinin tezliklə rusiyalı həmkarları ilə görüşəcəyini bildirib. Rusiya Xarici İşlər Nazirliyi yaxın günlərdə belə təmasların olmasını istisna etməyib.
