“Yaxın bir neçə həftədə Vaşinqton və Tehran İran nüvə proqramı üzrə Birgə Hərtərəfli Fəaliyyət Planının bərpası ilə bağlı razılığa gələ bilər”.
Azpost.info xəbər verir ki, “Bloomberg” bu barədə məlumatlı mənbəyə istinadən yazıb.
ABŞ və Avropanın yüksək rütbəli rəsmiləri agentliyə bildiriblər ki, tərəflər razılığa həmişəkindən daha yaxındırlar.
Bununla belə, “Bloomberg”a danışan iki mənbə qeyd edib ki, ABŞ və İran bəzi əsas məsələlərdə razılığa gələ bilmir. Birləşmiş Ştatlar beynəlxalq ekspertlərin İranın nüvə sahəsində keçmiş fəaliyyətləri ilə tanış olmasını təmin etməyə çalışır. Tehran isə keçmiş prezident Donald Trampın 2018-ci ildə etdiyi kimi, gələcək ABŞ hakimiyyətinin bu sazişdən çıxacağı təqdirdə,Vaşinqtondan iqtisadi zəmanət istəyir.
Birgə Hərtərəfli Fəaliyyət Planı İran və BMT Təhlükəsizlik Şurasının beş üzvü və Almaniya tərəfindən 2015-ci ildə imzalanıb. Tərəflər nüvə proqramını məhdudlaşdırmaq müqabilində İrana qarşı sanksiyaları ləğv etmək barədə razılığa gəliblər. Üç il sonra Tramp administrasiyası İrana qarşı sanksiya təzyiqi siyasətini bərpa edərək sazişdən çıxıb.
Azpost.info
