Mənim xəbər aparıcısı kimi fəaliyyət göstərdiyim dövrdə jurnalistlər xalqla səmimi ünsiyyətdə idi. Sadəcə, üzərimizə düşən məsuliyyəti yerinə yetirməyə çalışırdıq, şöhrət qazanmaq haqqında düşünmürdük. Efirdə nitq mədəniyyəti və davranış qaydalarına dərindən bələd idik. Əsas prinsipimiz ictimai qınaq idi. Hər sözümüzə, hər hərəkətimizə xüsusi diqqət yetirirdik.
Bu fikirləri AZƏRTAC-a açıqlamasında tanınmış aparıcı, Əməkdar artist Gülşən Əkbərova deyib.
Onun sözlərinə görə, keçmiş və hazırkı dövr tamamilə fərqlidir.
“O zaman televiziya kanallarının sayı məhdud idi, bu sahədə olan yükü çiyinlərimizdə daşımaqdan qürur duyurduq. İndi isə həm ənənəvi televiziya kanalları, həm də internet televiziyaları çoxalıb. Dövr dəyişib, aparıcılıq bir növ dəbə çevrilib. Təəssüf ki, bəzi aparıcılar şöhrətdən sui-istifadə edirlər. Hazırda bu sahədə qeyri-ixtisaslaşmış, hətta ali təhsil almayan şəxslər də fəaliyyət göstərir. Bəzilərinin nitq mədəniyyəti demək olar ki, yox səviyyəsindədir, danışıq qabiliyyəti zəifdir, söz ehtiyatı kasaddır və efirə lazımi hazırlıq olmadan çıxırlar. Bu cür aparıcıların səsləndirdiyi bəzi fikirlər haqlı olaraq cəmiyyətin tənqidinə səbəb olur. İnsanları ailə vəziyyətinə görə fərqləndirmək, onları ayrı-seçkiliyə məruz qoymaq yolverilməzdir. Burada əsas məsələ təhsil deyil. Axı Mirzə Cəlilin, Üzeyir Hacıbəylinin, M.Ə.Sabirin jurnalist kimi ali təhsili yox idi, amma onlar necə böyük irs yaratdılar! “Molla Nəsrəddin” jurnalını cəmiyyətə ərməğan etdilər. Təhsil, sadəcə, diplomla ölçülməməlidir. İnsan öz əməlləri və fəaliyyəti ilə savadını sübut etməlidir”,- deyə G.Əkbərova əlavə edib.
