Əfqanıstanın Əxlaqın təşviqi və əxlaqsızlığın qarşısının alınması üzrə Nazirliyi hüquq-mühafizə orqanları ilə birgə əməliyyat keçirib.
AzPost xəbər verir ki, əməliyyat nəticəsində Bəlx və Nəngərhar vilayətlərində üç nəfər cadugərlikdə şübhəli bilinərək saxlanılıb.
Rəsmi açıqlamaya görə, həmin şəxslər sehr və magiya ilə bağlı ayinlər icra edərkən yaxalanıblar. Onların üzərindən xüsusi alətlər və okkultizmlə bağlı kitablar götürülüb.
İlkin istintaqdan sonra saxlanılanlar şəriət qanunvericiliyinə uyğun olaraq məhkəmə orqanlarına təhvil verilib. Nazirlik bildirir ki, bu şəxslər cadugərlik adı altında ailələr arasında ədavət yaradır, insanları aldatmaqla maddi qazanc əldə edirdilər.
Balx və Nəngərhar sakinləri hökumətin addımını müsbət qiymətləndirib. Onların sözlərinə görə, illərdir belə şəxslər insanları çaşdıraraq böyük məbləğlər qoparırdı. Hazırda isə bu cür halların azaldığı və dini qaydalara zidd praktikaların qarşısının alındığı vurğulanır.
