Argentina Böyük Britaniyaya Folklend (Malvin) adaları yaxınlığında neft hasilatına yol verilməməsi ilə bağlı iki həftəlik ultimatum verib.
Bu barədə sentyabrın 29-da Argentina Prezidenti Xavyer Mileyin mətbuat xidmətinin yaydığı məlumatda bildirilib.
“Argentina Respublikası Böyük Britaniya və Şimali İrlandiya Birləşmiş Krallığından Argentina kontinental şelfində karbohidrogen ehtiyatlarının işlənməsinə yönəlmiş fəaliyyətin başlanmasının və ya davam etdirilməsinin qarşısını almaq üçün zəruri tədbirləri iki həftə ərzində görməyi rəsmi şəkildə tələb edib”, – məlumatda qeyd olunub.
Argentina hakimiyyəti Britaniyanın bu tələbi yerinə yetirməyəcəyi təqdirdə məsələ ilə bağlı Dəniz Hüququ üzrə Beynəlxalq Tribunala müraciət etmək niyyətindədir.
Argentina Prezidentinin mətbuat xidmətinin açıqlamasında vurğulanıb ki, Folklend adalarının Britaniyanın dənizaşırı ərazisi statusunda olması Argentina tərəfindən tanınmır.
Buenos-Ayres bildirir ki, bu məsələdə passiv mövqe tutmayacaq və özünün suveren hüquqlarını müdafiə etməkdə davam edəcək.
Argentina tərəfi bunu milli və beynəlxalq hüquqla tanınan diplomatik, inzibati və hüquqi vasitələrdən istifadə etməklə həyata keçirəcəyini açıqlayıb.
Folklend adaları Argentina tərəfindən “Malvin adaları” adlandırılır. Adaların hansı ölkəyə məxsus olması uzun illərdir Argentina ilə Böyük Britaniya arasında mübahisənin əsas mövzularından biridir.
