Vinqrom
Norveçin Vinqrom kəndindəki qədim bütpərəst məbədinin yerində arxeoloqlar qızıl xəzinə aşkar ediblər.
AzPost bildirir ki, bu barədə Norveçin “Forskning” internet nəşri yazır. Tapılan xəzinədə qeyri-adi formada olan 35 sikkə aşkar olunub.
İnsan dırnağı boyda olan qızıl sikkələr kvadrat formadadır. Tapıntıların çox kiçik olmasına baxmayaraq, burada bahalı paltarlar geyinmiş qadın və kişi təsvir olunub, onların dəbdəbəli saç düzümləri də gözə dəyir. Bəzilərində bir-birinə baxan cütlüklər həkk olunub. Hətta onların üzərində olan zinət əşyalarını, qabları, çubuqları və üzükləri görmək olur.
Qazıntılarda iştirak edən Oslo Universitetinin arxeoloqu Nikolay Ekxofun dediyi kimi, bu əşyaların köməyi ilə V əsrdən 751-ci ilə qədər Frank krallığını idarə edən Merovinqlər sülaləsinin geyimlərini öyrənmək mümkündür.
Arxeoloq hesab edir ki, cütlükləri olan qızıl sikkələr iyeroqamiya mifini – Skandinaviyada məhsuldarlıq tanrısı Frey ilə nəhəng Gerd arasında müqəddəs toyu göstərir. Bu sikkələrdən bayramlarda və ya ənənəvi mərasimlərdə bəxşiş kimi istifadə edilə bilərdi.
