“ATƏT Rusiya və Ukrayna arasında sülh danışıqlarını dəstəkləməyə hazırdır”

ATƏT Baş katibi Helqa Mariya Şmid rəhbəri olduğu qurumun Rusiya və Ukrayna arasında sülh danışıqlarını dəstəkləməyə hazır olduğunu bildirib.

Azpost.info xəbər verir ki, Şmid Çinin Ukrayna üzrə “sülh planı” ilə bağlı Almaniya prezidenti Frank-Valter Ştaynmayerlə həmrəy olduğunu bildirib.

Ştaynmayer demişdi ki, Çinin Ukrayna və Rusiya arasında münaqişənin həllində konstruktiv rol oynaya bilməsi şübhə doğurur. “Əgər belədirsə, o zaman Çin təkcə Moskva ilə deyil, Kiyevlə də danışmalıdır”, – Almaniya prezidenti vurğulamışdı.

“Mən ancaq bununla razılaşa bilərəm və əlavə edə bilərəm ki, ATƏT də indiki məqamda öz töhfəsini verəcək”, – ATƏT Baş katibi qeyd edib. O bildirib ki, Rusiya ATƏT-in üzvüdür və Moskvanın hücumundan qısa müddət əvvəl təşkilat Moskvaya Ukrayna ilə bağlı dialoq təklif edib. Lakin Rusiya dialoqun əleyhinə, müharibənin lehinə qərar verib.

Azpost.info