Avropa İttifaqı (Aİ) Şurası Rusiya Mərkəzi Bankının dondurulmuş aktivlərinin geri qaytarılmasını müvəqqəti olaraq qadağan etmək qərarına gəlib.
Şuranın məlumatında qərarın Aİ-nin iqtisadiyyatına dəyəcək ziyanı məhdudlaşdırmaq məqsədilə təxirəsalınmaz şəkildə qəbul edildiyi qeyd olunub.
Həmçinin bildirilib ki, belə bir qadağa olmadığı halda, əlavə resurslar birbaşa Rusiyanın Ukraynaya qarşı təcavüzkar müharibəsini maliyyələşdirmək üçün istifadə olunacaq və bu da Aİ-nin və üzv dövlətlərin iqtisadiyyatı üçün ciddi nəticələr doğuracaqdı. Bu, həmçinin üzv dövlətlərə qarşı və Aİ ərazisində hibrid xarakterli düşmənçilik fəaliyyətlərinin eskalasiya riskini artıraraq, İttifaq daxilində iqtisadi çətinlikləri daha da dərinləşdirəcəkdi. Bununla yanaşı, iqtisadi qeyri-müəyyənliyin uzanması və ağırlaşması, üzv dövlətlər tərəfindən daha geniş fiskal tədbirlərin görülməsini tələb edəcəkdi.
Razılaşdırılan tənzimləmə konkret olaraq Rusiya Mərkəzi Bankının, eləcə də onun adından və ya onun göstərişi ilə fəaliyyət göstərən hər hansı hüquqi şəxsin, qurumun və ya təşkilatın aktivlərinin və ya ehtiyatlarının birbaşa və ya dolayı yolla köçürülməsini müvəqqəti olaraq qadağan edir.
“Bu tədbirlər müvəqqətidir və Ukraynaya qarşı müharibə çərçivəsində Rusiyaya onun fəaliyyətlərini davam etdirməyə imkan verən əhəmiyyətli maliyyə və digər resursların əlçatan olması Aİ və üzv dövlətlər daxilində ciddi iqtisadi çətinliklər yaratdığı və ya yarada biləcəyi müddətdə, həmçinin İttifaqın və üzv dövlətlərin iqtisadi vəziyyətində daha ciddi pisləşmə riskinin davam etdiyi müddətcə qüvvədə saxlanılmalıdır”, – deyə məlumatda bildirilib.
