Sankisya
Avropa İttifaqında (Aİ) Rusiyaya qarşı yeddinci sanksiyalar paketi üzərində iş gedir.
Azpost.info bildirir ki, bu barədə Polşa xarici işlər nazirinin müavini Pavel Yablonski Polşa Mətbuat Agentliyinə verdiyi müsahibəsində bildirib.
Polşa Xarici İşlər Nazirliyinin nümayəndəsi yeddinci sanksiyalar paketi üzərində işin artıq başlayıb-başlanılmaması ilə bağlı sualı cavablandıraraq deyib: “Əlbəttə, bəli”. “Sanksiyalar daha da kəskin olmalıdır: Rusiyanın hələ də sata bildiyi qaz kontekstində, bütün Rusiya banklarının SWIFT sistemindən ayrılması kontekstində. Burada mən ilk növbədə “Qazprombank”dan danışıram”, – o deyib.
“Bizə hələ də Rusiyaya tədarük edilə bilən və Rusiya tərəfindən öz sənayesində istifadə oluna bilən texnologiyalara embarqo lazımdır”, – Yablonski əlavə edib.
Onun sözlərinə görə, sanksiyalarla yanaşı Rusiyanın Avropadakı aktivlərinin müsadirə edilməsi də lazımdır. “Bu istiqamətdə işlər artıq aparılır”, – nazir müavini deyib.
Müxtəlif subyektlərin sanksiyalardan yayınması məsələsinə gəlincə, Yablonski etiraf edib ki, bu, hələlik böyük problem olaraq qalır. “Subyektlərin çoxu sanksiyalardan yan keçmək, onlardan yayınmağın yaradıcı yollarını tapmaq üçün çox işlər görür. Biz bunu ən azı qaza görə ödənişlər məsələsində görürük. Bir çox şirkətlər və Aİ ölkələri Qazprombank-da hesablar açmaq qərarına gəliblər. Ödənişlər sanki formal olaraq avro və dollarla olur ki, bu da faktiki olaraq dərhal rubla çevrilir”, – deyə o bildirib.
İyunun 3-də Aİ Şurası Rusiya Federasiyasına qarşı sanksiyaların altıncı paketini qəbul edib.
