Azərbaycanın neftini beynəlxalq bazarlara ixrac edən Ceyhan terminalı zəlzələdən dəyən ziyanın qiymətləndirilməsi səbəbindən fevralın 8-ə kimi işləməyəcək.
Bu barədə Reuters agentliyi məlumatlı mənbələrə istinadən xəbər verir.
“Ceyhan terminalı operatorlar tərəfindən zəlzələdən dəyən ziyanı qiymətləndirənə kimi dayandırılıb. Terminal fevralın 6, 7 və 8-i bağlı olacaq. Bunu Türkiyənin gəmiçilik xidmətində çalışan mənbə bazar ertəsi bildirib”, – xəbərdə deyilir.
Mənbə əlavə edib ki, İskəndərun sənaye qovşağında yerləşən Limak limanının bəzi yük sahələrində yanğın hələ də söndürülməyib və bu səbəbdən bütün işlər dayandırılıb.
“BP -Azərbaycan” şirkətinin sözçüsü Tamam Bayatlı bu gün bildirib ki, Bakı-Tbilisi-Ceyhan kəmərinə heç bir zərər dəyməyib: “BTC vasitəsilə ixrac əməliyyatları davam edir və neft Ceyhan terminalında olan çənlərə toplanılır. Ceyhan terminalının tankerlərə neft yüklənilən hissəsində neft sızması aşkarlanması səbəbindən neftin gəmilərə doldurulması müvəqqəti olaraq dayandırılıb”.
Onun sözlərinə görə, sızma artıq aradan qaldırılıb və qiymətləndirmə işləri aparılır. Bu işlər bitəndən sonra terminaldan gəmilərin yola salınması bərpa ediləcək.
