Kapitulyasiya aktının imzalandığı gündən Ermənistanın bütün hərəkətləri Azərbaycanı guya danışıqlarda marağı olmayan, aqressiv ölkə kimi təqdim etməyə, həmçinin Bakıya siyasi təzyiqin zəruri olmasına yönəlib. İrəvan İkinci Qarabağ müharibəsindən sonra yaranmış status-kvo ilə barışmazlıq fəlsəfəsindən çıxış edir.
Bu fikirləri AZƏRTAC-a müsahibəsində Türkiyənin Azərbaycandakı sabiq hərbi attaşesi, general-mayor Yücel Karauz Müdafiə Nazirliyinin fevralın 21-dən 22-nə keçən gecə Azərbaycan Silahlı Qüvvələrinin mövqelərinin atəşə tutulmasını şərh edərkən söyləyib.
O bildirib ki, bununla belə, Ermənistan hər hansı qüvvənin – Rusiya, Avropa və ya ABŞ-ın himayəsinə kəskin ehtiyac duyur, onlardan öz maraqlarına uyğun istifadə etməyə çalışır. “Hərçənd Ermənistanın bu cür böyük güclərə “siyasi oyunu”, sadəcə, qeyri-mümkündür. Bu ölkə iqtisadi və hərbi baxımdan məhv olmağın bir addımlığındadır. İkinci Qarabağ müharibəsi zamanı erməni silahlı qüvvələrinin 60-65 faizi iflic olub, məhv edilib və yararsız vəziyyətə düşüb. Əgər Ermənistan destruktiv mövqeyini davam etdirsə və Qərblə oynamağa davam etsə, daxili problemlərin içərisində çabalayan bu ölkə öz hökmünü özü verəcək. Yeni eskalasiyadan sonra o, artır özünə gələ bilməyəcək”, – deyə general vurğulayıb.
Gərginliyin artmasının yeni ciddi mərhələsinin başlaması riskinin həmişə mövcud olduğunu söyləyən Y.Karauz deyib: “Aİ-nin mülki missiyasına baxmayaraq, Azərbaycanın sərhəddəki mövqelərinə atəş açılması barədə bugünkü xəbər bunu bir daha təsdiq edir. Təbii ki, Azərbaycan baş verənlərə seyrçi qala bilməz, həm də atəşkəs haqqında razılaşma da müvəqqəti sənəddir. Hələ ki, onu sülh sazişi ilə əvəz etmək mümkün olmayıb. İrəvan bilməlidir ki, hər kəsin səbrinin sonu var və Bakının səbrini daşırmamalıdır”.
Aİ-nin mülki missiyasının tərkibində fransız jandarmları və alman polislərinin daxil olmasına münasibət bildirən sabiq hərbi attaşesi qeyd edib ki, bu, ədalətsizliyi normal hal kimi təqdim etmək cəhdidir. “Avropa İttifaqının fəallığı 1994-cü ildə yaradılan ATƏT-in Minsk qrupunun çox keçmədən öz səmərəsizliyini göstərməsi fonunda meydana çıxıb, eyni zamanda, Aİ İkinci Qarabağ müharibəsi zamanı öz daxili problemləri – pandemiya və digər məsələlərlə məşğul idi və münaqişəyə arzuolunan təsiri göstərə bilmədi. İndi Avropa missiyasının Bakı ilə İrəvan arasında sülhün olmaması və münaqişə vəziyyətinin davam etməsi bəhanəsi ilə regiona göndərilməsi, həmçinin Aİ-nin “şıltaq uşaq” kimi Ermənistanı qoruması və başını sığallaması faktı (Fransa Prezidenti Emmanuel Makronun Münxen təhlükəsizlik konfransında onun “gələcəkdə də Ermənistanın yanında olacağı və birlikdə hərəkət edəcəyi” barədə sözlərini xatırlayaq), zənnimcə, ədalətsizliyi və qanunsuzluğu normal bir hal kimi qələmə vermək cəhdidir. Böyük Britaniyanın sağlam yanaşmasına rəğmən, missiyanın tərkibinə fransız jandarmlarının və alman polislərinin daxil edilməsi “ayı xidməti”ndən başqa bir şey deyil”, – deyə diplomat qeyd edib.
Onun sözlərinə görə, Azərbaycanla Ermənistan arasında bütün məsələlər ikitərəfli qaydada, danışıqlar yolu ilə həll edilməlidir. Əks halda, şərait mürəkkəbləşə bilər.
Y.Karauz sonda deyib: “Azərbaycanla Ermənistan arasında sülh yalnız birbaşa danışıqlar, mövcud fikir ayrılıqlarının həlli yolu ilə təmin edilə bilər. Belə ki, bu prosesə hər hansı digər ölkənin cəlb olunması əlavə çətinliklərə və xaosa gətirib çıxarar. Çünki hər bir ölkənin öz maraqları var”.
