Azərbaycan Prezidentinin köməkçisi Hikmət Hacıyev ABŞ iqtisadçısı və professor Ceffri Saksla söhbətdə Azərbaycanın enerji siyasəti, Avropa ilə əməkdaşlıq, Ermənistanla sülh prosesi və Cənubi Qafqazın gələcək inkişafı barədə danışıb.
Azpost.info bildirir ki, Ceffri Saks işgüzar səfərlə Bakıda olub. O, səfər çərçivəsində Azərbaycan Prezidentinin köməkçisi Hikmət Hacıyevlə görüşüb. Görüşdə Cənubi Qafqazın iqtisadi əməkdaşlıq məkanına çevrilməsi, yaşıl enerjinin inkişafı, Xəzər dənizinin potensialı və COP29 iqlim sammitinin keçirilməsi məsələləri müzakirə olunub.
Görüş zamanı professor, həmçinin Roma Papasının sülh və süni intellekt məsələlərinə həsr olunmuş ensiklikasını təqdim edib.
Azpost.info-nun məlumatına görə, H. Hacıyev söhbət zamanı bildirib ki, Avropa Komissiyasının Prezidenti Ursula fon der Lyayenin Azərbaycana son səfəri zamanı müzakirələrin mühüm hissəsi Xəzər dənizinin sahillərindən Avropanın enerji sisteminə uzanacaq yaşıl enerji dəhlizi ilə bağlı olub.
Onun sözlərinə görə, əvvəlki səfərlərdə olduğu kimi, karbohidrogen ehtiyatları və Avropa bazarı Azərbaycanın gündəliyində mühüm yer tutur. Lakin hazırda bərpaolunan enerji mənbələrindən elektrik enerjisinin Avropaya çatdırılması da əsas müzakirə istiqamətlərindən birinə çevrilib.
Azərbaycan Avropaya əlavə 8 QVt yaşıl enerji ixrac edə bilər
Hikmət Hacıyev Azərbaycanın bərpaolunan enerji sahəsində böyük potensiala malik olduğunu vurğulayıb. “Artıq bir neçə ildən sonra Azərbaycan bərpaolunan mənbələr hesabına əlavə 2 QVt elektrik enerjisi gücünə malik olacaq. Daha bir neçə ildən sonra isə ixraca hazır əlavə 8 QVt gücümüz olacaq”, – deyə o bildirib.
Prezidentin köməkçisi qeyd edib ki, yaşıl enerji strategiyası Ermənistanla sülh quruculuğu prosesi ilə də əlaqələndirilir. Onun sözlərinə görə, Azərbaycan artıq regionda ayırıcı xətlər və divarlar qurmaq əvəzinə, sülh yaratmağa və parçalanmanı aradan qaldırmağa çalışır. H.Hacıyev hesab edir ki, sülhün iqtisadi üstünlükləri və dividendləri nümayiş etdirilməlidir. Yaşıl enerji də bu strategiyanın tərkib hissəsinə çevrilə bilər.
“Böyük güclərin döyüş meydanından bazarına”
Hikmət Hacıyev Azərbaycanın Cənubi Qafqazın geosiyasi rolunu dəyişmək istədiyini bildirib. “Biz regionu böyük güclərin döyüş meydanından böyük güclər üçün bazara çevirmək istəyirik. Tərəfdaşlarımıza sübut etmişik ki, müharibə aparmaqdansa, ticarət etmək daha yaxşıdır”, – deyə o vurğulayıb.
Prezidentin köməkçisi bu yanaşmanın nümunəsi kimi 1994-cü ildə imzalanmış “Əsrin müqaviləsi”ni göstərib. Onun sözlərinə görə, Azərbaycanın neft-qaz ehtiyatlarının işlənməsinə dair həmin layihəyə ABŞ, Avropa, Türkiyə, ərəb ölkələri və hətta İran şirkətləri dəvət olunmuşdu.
Hacıyev bildirib ki, Azərbaycan tarixdən dərs çıxararaq regionun sülhə, sabitliyə və əməkdaşlığa xidmət etməsi üçün çalışır. “Azərbaycanın qarşısında iki yol var idi: əbədi müharibə və ya əbədi sülh”
Prezidentin köməkçisi Ermənistanla 30 il davam edən münaqişəyə və işğal dövrünə baxmayaraq, Azərbaycanın sülh yolunu seçdiyini deyib. Onun sözlərinə görə, Prezident və Azərbaycanın rəhbərliyi böyük siyasi və diplomatik cəsarət nümayiş etdirərək qonşu Ermənistana sülh əlini uzadıb. “Bizim iki yolumuz var idi: əbədi müharibə və ya əbədi sülh. Biz əbədi sülh yolunu seçdik”, – H.Hacıyev bildirib.
O əlavə edib ki, bu strategiya çərçivəsində Cənubi Qafqaz əməkdaşlıq məkanına çevrilir və Azərbaycan qonşu Ermənistanla birlikdə sülhün üstünlüklərini əldə etməyə çalışır. H.Hacıyev vurğulayıb ki, söhbət yalnız kağız üzərində bəyan edilmiş sülhdən getmir. Azərbaycan insanların gündəlik həyatında hiss edə biləcəyi, real nəticələr verən sülh qurmağa çalışır. “Biz elə bir real sülh yaradırıq ki, insanlar ona toxuna, onun dəyərini hiss edə bilsinlər. Müstəqilliyimizin 35 ili ərzində, bunun böyük hissəsi müharibə şəraitində keçdikdən sonra sülh həyatının qiymətini anlasınlar”, – deyə o qeyd edib.
Prezidentin köməkçisinin sözlərinə görə, Azərbaycan indi sülh şəraitində yaşamağın dəyərini sınaqdan keçirir, bu sülhü qorumaq və möhkəmləndirmək, gələcək nəsillər üçün davamlı təhlükəsizlik arxitekturası qurmaq niyyətindədir.
S. Abdulla
