İqtisadçı-ekspert Natiq Cəfərli tariflərin artırılmasını təklif edən “Azərsu” ASC-ni sərt tənqid edib.
Azpost.info bildirir ki, N.Cəfərli “Azərsu ASC”nin sədr müavini Etibar Məmmədovun bununla bağlı açıqlamasını “bərbad idarəetmə” adlandırıb.
Etibar Məmmədov açıqlamsında içməli suyun əhaliyə maya dəyərindən aşağı satıldığını deyib. Məmur qeyd edib ki, tariflər normal olsa, “Azərsu” ASC daha rentabelli fəaliyyət göstərə bilər. “Tariflərin gələcəkdə artırılması üçün biz də təşəbbüslə çıxış etmək istəyirik. İnkişaf etmiş ölkələrin heç birində bu tariflə su satılmır”.
N.Cəfərli bu arqumentə etiraz edib: “Bunlar rəsmən camaatı dolayıblar. Etibar müəllim, suyun maya dəyərini necə hesablayırsız? Cəmi 2 il əvvəl suyun qiymətini birdən-birə 2 dəfə artırdınız, yenə gözünüz doymadı?! Rentabelli işləmək üçün qiymət artırmaq ən sonuncu yoldur. İqtisadiyyat elmi deyir ki, maya dəyərini aşağı salmaq üşün ilk növbədə xərcləri azaltmaq lazımdır. Yəni, məhz məmurların oğurladığı pullar, xərcləri şişirtməsi maya dəyərini artıran əsas amildir. Yaxşı, gəlin belə bir eksperiment edək. Jurnalistlərdən ibarət bir qrup “Azərsu ASC”-nin bütün rəhbərlərinin evlərini, bağlarını, sürdüyü maşınları çəksin. Sonra da siz hamınız çıxın izah edin ki, rentabelsiz işləyən “Azərsu” rəhbərliyi nədən ərəb şeyxləri kimi yaşayırlar?! Yaxşı, ziyanla işləyirsinizsə, nədən bu qədər varlısınız?!”
Ekspert bildirib ki, məmurlar qiymət artırmaq istəyəmdə inkişaf etmiş ölkələrə istinat edirlər, amma maaş-təqaüdə gələndə Afrikanı misal gətirirlər: “İnkişaf etmiş ölkələrdə dövlət inhisarçı şirkətlər, onları korrupsioner idarəedənlər olmur, maya dəyərini də şəffaf hesablayırlar, insanlar da normal maaş-təqaüd alırlar”.
