Xroniki yüksək arterial təzyiq sağlamlıq üçün ciddi təhlükə yaradır. Bu vəziyyət insult və ağır ürək-damar xəstəliklərinin inkişaf riskini əhəmiyyətli dərəcədə artırır. Həkim tərəfindən təyin edilən dərman müalicəsi ilə yanaşı, düzgün qidalanma və kifayət qədər fiziki aktivlik qan təzyiqinin normal səviyyədə saxlanılmasında mühüm rol oynayır.
Bu barədə “Express” nəşri məlumat yayıb.
Nyu-Yorkdakı Mount Sinai Fuster Heart Hospital-ın kardioloqu, doktor Annapurna Kini qan təzyiqinin normal saxlanmasına kömək edə biləcək əlçatan tərəvəzin adını açıqlayıb. Onun sözlərinə görə, söhbət hamının tanıdığı çuğundurdan gedir.
Mütəxəssis bildirir ki, çuğundurun müntəzəm olaraq qida rasionuna daxil edilməsi damarların genişlənməsinə və onların elastikliyinin qorunmasına kömək edə bilər.
Bu xüsusilə vacibdir. Çünki yaş artdıqca qan damarları təbii olaraq elastikliyini itirir. Bundan başqa, damar divarlarında xolesterin lövhələri əmələ gələ bilər ki, bu da qan təzyiqinin yüksəlməsinə səbəb olur.
Dietoloq Natali Rizzo çuğundurun faydasının tərkibindəki təbii nitratların yüksək miqdarı ilə əlaqəli olduğunu bildirir. Bu birləşmələr orqanizmə daxil olduqdan sonra azot oksidinə çevrilir. Azot oksidi damarların hamar əzələlərini boşaldır, qan dövranını yaxşılaşdırır və təzyiqin aşağı düşməsinə kömək edir.
Çuğundurun yarpaqları da faydalı hesab olunur. Rizzo onları az miqdarda sarımsaq və duz əlavə etməklə zeytun yağında yüngülcə qızartmağı tövsiyə edir. Bu göyərtini evdə hazırlanan şorbalara, tərəvəzli yeməklərə və təzə salatlara da əlavə etmək olar.
Böyük Britaniyanın Milli Səhiyyə Xidməti (NHS) xəbərdarlıq edir ki, nəzarətsiz qalan yüksək qan təzyiqi həyati vacib orqanlara və qan-damar sisteminə tədricən zərər vurur.
Müalicə olunmayan hipertoniya infarkt, qəfil insult, böyrək və ürək çatışmazlığı, aorta anevrizması, damar mənşəli demensiya, görmənin kəskin pisləşməsi və cinsi funksiyanın pozulması riskini dəfələrlə artırır.
Risk qrupuna daxil olan şəxslər arterial təzyiqlərini mütəmadi ölçməli və həkim nəzarətində olmalıdırlar.
Düzgün qidalanma və faydalı məhsullar hipertoniya riskinin azaldılmasına kömək edə bilər. Lakin bunlar həkimin təyin etdiyi dərmanları heç bir halda əvəz etmir.
