Azərbaycanda qızıl, mis və gümüş hasilatı ilə məşğul olan “Anglo Asian Mining” (AAM) şirkəti Britaniyanın “ACG Metals Limited” şirkətinə satıla bilər.
Azpost.info-nun məlumatına görə, bu barədə “APA-Economics”ə “Anglo Asian Mining” şirkətindən bildirilib. Qeyd edilib ki, “ACG Metals Limited” noyabrın 26-da AAM-in mövcud və buraxılacaq bütün adi səhm kapitalını almaq imkanını araşdırdığını bəyan edib. Bununla belə, AAM-ə mümkün sövdələşmə ilə bağlı hələlik rəsmi təklif göndərilməyib.
Rəsmi prosedurlara görə, ACG ya 24 dekabr 2025-ci il tarixinə kimi rəsmi təklif irəli sürməli, ya da almağa niyyətinin olmadığını bildirməlidir. Bu müddət yalnız Böyük Britaniyanın Şirkətlərin Satınalmaları və Birləşmələri üzrə Nəzarət Panelinin razılığı ilə uzadıla bilər.
“Anglo Asian” məhz bunu nəzərə alaraq, yəni mümkün satınalma ilə bağlı yayılan ehtimallar və səhmlərin qiymətində qeyri-adi dəyişikliklər səbəbilə noyabrın 26-da London Birjasının AIM platformasından öz adi səhmlərinin ticarətinin dayandırılmasını xahiş etmişdi.
Rəsmi məlumat açıqlanandan sonra ticarətin noyabrın 27-də bərpa ediləcəyi gözlənilir.
AAM səhmdarlara hazırkı mərhələdə hər hansı addım atmamağı tövsiyə edib.
Qeyd edək ki, “ACG Metals Limited” Britaniya Vircin adalarında qeydiyyata alınmış şirkətdir. Əsas fəaliyyəti qızıl, mis, gümüş kimi metalların hasilatı və emalı sahələrinə yönəlib. Şirkət regional layihələrdə, o cümlədən Türkiyədəki mədən layihələrində iştirak edir.
