Taksi
Taksi fəaliyyəti ilə bağlı daha bir şikayət daxil olub. AzPost xəbər verir ki, Orxan Həsənov adlı vətəndaş Yango Azerbaijan taksi sifarişi zamanı xoşagəlməz hadisə ilə üzləşib.
Onun sözlərinə görə, bir yaşlı uşağı ilə birlikdə sifariş etdiyi taksiyə minib. Uşaq ac olduğu üçün anası ona kraks çubuğu verib. Bu zaman sürücü qəfil yüksək tonla sərnişinə xəbərdarlıq edib ki, “maşında yeyib-içmək olmaz”. Sərnişin isə uşağın ac olduğunu və yerə heç nə düşmədiyini bildirib. Lakin sürücü “belə olsa, aparmayacam” deyə hədələyib. Mübahisənin böyüməsinin qarşısını almaq üçün sərnişin yolu yarımçıq kəsərək maşından düşüb.
Şikayətçi həmçinin bildirir ki, hadisə barədə şirkətə rəsmi müraciət etsə də, yalnız şablon cavab alıb.
Qanunvericilik baxımından vəziyyət necədir?
Mövcud qanunlara görə, “Taksi fəaliyyəti Qaydaları”na əsasən sürücü sərnişinləri təhlükəsiz və rahat şəkildə təyinat yerinə çatdırmağa borcludur. Sərnişinlərin davranış qaydaları da nəzərdə tutulub: onlar avtomobilə ziyan vurmamalı, nəqliyyat vasitəsinin daxili təmizliyini qorumalıdırlar. Lakin qanunda sərnişinin maşında yeyib-içməsinə qadağa qoyulmur. Yalnız fövqəladə hal yarandıqda və ya avtomobilin təhlükəsiz idarə olunmasına mane olduqda sürücü sərnişini yoldan düşürmək hüququna malikdir.
Beləliklə, qanuni baxımdan sərnişinin uşağına yemək verməsi qayda pozuntusu hesab edilmir. Sürücünün isə sərnişini aparmaqdan imtina etməsi yalnız əsaslı səbəb olduqda mümkündür.
Orxan Həsənov məsələnin AYNA və Yango tərəfindən araşdırılmasını, müvafiq tədbirlər görülməsini tələb edir.
