Avqustun 12-i gecə saatlarından başlayaraq, Oğuz – Qəbələ su xəttində təmir-bərpa işləri aparılır.
Azərbaycan Dövlət Su Ehtiyatları Agentliyinin mətbuat xidmətindən bildirilib ki, hazırda həmin ərazidə geniş tərkibli yenilənmə işləri görülür.
Təmir-bərpa işləri nəticəsində Yasamal, Səbail, Nəsimi, Binəqədi, Sabunçu, Xəzər, Suraxanı, Ramanı, Pirallahı rayonlarına suyun verilməsi rejimində dəyişiklik edilib. Əhalinin digər mənbələr hesabına suyla təmin olunması istiqamətində işlər aparılır.
İri Şəhərlərin Birləşmiş Su Təchizatı Xidmətinin təşkilatçılığı ilə həmin ərazilərin təminatında, həm də su maşınlarından istifadə olunacaq.
Oğuz – Qəbələ su xəttində aparılan təmir-bərpa işlərinin avqustun 16-sı axşam saatlarında yekunlaşması və həmin istiqamət üzrə tam rejimə çıxılması planlaşdırılır.
