Baydenin “Ərdoğanı devirəcəyik” sözləri Türkiyədə qəzəb yaratdı

16 Avqust 2020 - 00:48

ABŞ-ın hazırkı prezidenti Donald Trampın noyabrda keçiriləcək prezident seçkilərində əsas rəqibi olan demokratların namizədi Co Baydenin ötən ilin dekabrında Türkiyə və onun prezidenti Ərdoğan haqqında bir verilişdə işlətdiyi sözlərin bu gün mediada yayılması böyük etirazlara səbəb olub.

Mia.az Türkiyə mətbuatına istinadla xəbər verir ki, Bayden həmin verilişdə “Biz Türkiyədəki müxalifləri açıq dəstəkləməliyik. Türkiyə aldığı hava müdafiə sisteminin (Rusiyadan alınan S-400-ləri nəzərdə tutur- Mia.az) necə işləməsini anlamaq üçün çevrəsində F-15-lər uçurursa, o zaman bizim bəzi silahları onlara satıb-satmayacağımızın bir bədəli olmalıdır. Bu məsələdə çox narahatam, çox. Ancaq biz birbaşa məsələyə müdaxilə edə, hələ var olan türk müxalif liderlərini Ərdoğanla üz-üzə gətirmək və ona qarşı ürəkləndirə bilərik. Onu məsələsini çevrilişlə deyil, bir seçki prosesi ilə edə bilərik…

O və partiyası İstanbul (bələdiyyə seçkilərini nəzərdə tutur – redak.) seçkisində uduzdu. Bəs biz nə edirik? Oturub, təslim oluruq, gözləyirk. Onunla (Ərdoğanla) bir neçə dəfə kürd problemi ilə bağlı söhbət etdim. Bu məsələdə ona təslim olacağım ən son istəyəcəyim şey olardı. Bir sözlıə, biz məsələləri konkretləşdirməliyik. Çünki Türkiyə də Rusiyaya bel bağlamaq istəmir. Onlar (Türkiyə) uzun müddət almadan bir dişlək aldılar. Ancaq indi onunla (Əroğanla) bu günə kimi davrandığımız kimi, davrana bilmərik. İndi çox narahatam, oradakı hava bazalarmız, onlara əlçatanlığımızdan narahatam. Bölgədəki mütəffiqlərimizlə bir araya gəlib, onu necə izolasiya edə biləcəyimiz müzakirə etməliyik. Xüsusilə Şərqi Aralıq dənizindəki neft məsələsi və sair çox uzun çəkəcək…”, – deyib.

Baydenin “Ərdoğanı hərbi çevrilişlə deyil, seçki ilə devirməliyik”, – anlamı yaradan çıxışında Türkiyədəki müxalifətə, xüsusi ilə kürd toplumuna açıq və ciddi dəstək verəcəyini bəyan etməsi, Türkiyədə çox kəskin etirazlara səbəb olub.

Türkiyəli nazir Fəxrəddin Altun sosial şəbəkədəki hesabında Türkiyənin müttəfiqi olan bir ölkənin prezidentliyə namizədinin diplomatik qaydalara tamamilə zidd çıxışının qəbuledilməz olduğunu yazıb: “Baydenin indi yayımlanan bu yersiz və uyğunsuz ifadələrinin hazırkı ABŞ rəhbərliyi üçün də qəbuledilməz olduğuna əminəm. Türkiyə siyasi oyunlara alət ediləcək bir ölkə deyil. Bu ifadələr ABŞ-Türkiyə müttəfiqliyinin ruhuna və ikili münasibətlərə qətiyyən uyğun deyil…”.

Daxili İşlər Nazirinin müavini İsmayıl Çataklı isə “Bu zavallının xəritə bilgisi də, tarix bilgisi də zəif imiş. Türkiyə ilə bəzi ölkələri qarışıdırıb deyəsən. Həddini bil, Co Bayden”, – deyə yazıb.

Co Baydenin Ərdoğanın hədəfə alan ifadələrinə AK Partiyanın sədr müavini Mahir Ünal da kəskin münasibət bildirib: “Türkiyənin müstəqilliyi, güclü yüksəlişini həzm edə bilməyib cürbəcür oyunlarla buna əngəl olmaya çalışanlar qarşılarında hər daim cumhurbaşkanımızı, millətimizin iradəsini görüblər. Bundan sonra da görməyə davam edəcəklər”.

Ünal bildirib ki, Baydenin Türkiyənin daxili işlərinə müdaxilə edəcəyini deməsi ilə Trampın onun zəkasının test edilməli olması haqda dediklərinə haqq qazandıb.

Səadət Partiyasının lideri Temel Karamollaoğlu isə belə reaksiya verib: “Türkiyə Türkiyədən idarə olunur. Ölkəmizin siyasətini dizayn etməyə əsla izin verməyəcəyik! Problemlərimiz nə qədər böyük olursa olsun, öz daxilimizdə çözəcək bilgi və təcrübəyə sahib ölkəyik”.

Keçmiş spiker Binəli Yıldırım: “Co Baydenin Ərdoğan və hökumətimizə qarşı ifadələri 15 iyul FETÖ hərbi çevriliş cəhdinin arxasında kimlərin olduğunu dəqiq ortaya qoydu. Bilinməlidir ki, xalqın gücünün üstündə bir güç yoxdur”.

Co Baydenin ifadələrinə qarşı müxalifət partiyası olan İYİ funksionerləri ilə yanaşı, CHP-li prezidentliyə keçmiş namizəd Muharrem İncə və MHP düşərgəsindən də çoxsaylı etirazlar gəlib.

Bir sözlə, Baydenin bu yersiz bəyanatı Türkiyədə iqtidarlı-müxalifətli hamını bir səngərdə birləşdirib.

Hazırda Türkiyədə TRT başda olmaqla, demək olar ki, bütün telekanallarda Co Baydenin Türkiyənin daxili işlərinə müdaxilə ilə bağlı bəyanatına kəskin etirazlar başlayıb.