Türkiyə nüvə proqramını genişləndirdikcə nüvə enerjisi texnologiyalarını müstəqil şəkildə hazırlamaq və istifadə etmək imkanına malik ölkəyə çevrilməyə çalışır. Bunu Türkiyənin energetika və təbii sərvətlər naziri Alparslan Bayraktar bildirib.
Bu barədə Turkiye Today məlumat yayıb.
Bayraktar kiçik modul reaktorları (KMR) nüvə enerjisinin “ikinci dövrü” adlandırıb və Türkiyənin bu sahədə milli potensial yaratmaq niyyətini açıqlayıb.
“Biz istəyirik ki, Türkiyə nüvə enerjisinin bu yeni dövründə öz enerji texnologiyalarından istifadə edə və öz resurslarını istehsal edə bilən ölkəyə çevrilsin. İnanıram ki, Türkiyənin mühəndislik potensialı bunun üçün kifayətdir. Hazırda bu istiqamətdə çox ciddi işlər aparılır”, – Bayraktar bildirib.
Akkuyu AES elektrik enerjisi istehsalına hazırlaşır
Türkiyənin nüvə enerjisi sahəsində daxili imkanlarını genişləndirmək planları Akkuyu Atom Elektrik Stansiyasında elektrik enerjisi istehsalına hazırlıq fonunda açıqlanıb.
Bayraktar bildirib ki, stansiyanın ilk reaktorunda elektrik enerjisi istehsalına yaxın bir neçə ay ərzində başlanması gözlənilir. Nazir layihəni Türkiyənin 70 illik nüvə enerjisi arzusunun reallaşması kimi qiymətləndirib.
Akkuyu Türkiyənin daha geniş nüvə enerjisi inkişaf proqramının bir hissəsidir. Bu proqram çərçivəsində üç atom elektrik stansiyasında ümumilikdə 12 ənənəvi reaktorun inşa edilməsi planlaşdırılır.
Türkiyə 2050-ci ilədək 20 000 MVt nüvə enerjisi gücünə çatmağı hədəfləyir. Bu məqsədlə Sinopda və Frakiyada da atom elektrik stansiyalarının tikintisi nəzərdə tutulur.
Bundan əlavə, ümumi gücün ən azı 5 000 MVt-nin kiçik modul reaktorlar hesabına təmin edilməsi planlaşdırılır. Ankara bu texnologiyanın inkişafı üçün beynəlxalq tərəfdaşlıq imkanlarını da araşdırır.
Enerji müstəqilliyi əsas hədəf olaraq qalır
Nazir vurğulayıb ki, Türkiyə nüvə energetikası ilə yanaşı, neft və təbii qaz hasilatını, bərpa olunan enerji mənbələrini və enerji səmərəliliyinin artırılması tədbirlərini də inkişaf etdirir.
Əsas məqsəd ölkənin xarici enerji mənbələrindən asılılığını azaltmaqdır.
Bayraktar bu asılılıqdan qurtulmağı Türkiyənin əsas milli vəzifələrindən biri adlandırıb. Onun fikrincə, daxili resurslardan istifadənin artırılması ölkənin həm iqtisadi, həm də strateji mövqeyini gücləndirəcək.
“Dünyada enerji istehlakı çox sürətlə artmaqda davam edir və enerjisiz həyat mümkün deyil. Eyni vəziyyət ölkəmiz üçün də keçərlidir. Buna görə də artan tələbatın lazımi şəkildə və xarici mənbələrdən deyil, öz daxili resurslarımız hesabına qarşılanması bizə çox ciddi iqtisadi töhfə verəcək”, – nazir bildirib.
Bayraktar Gabar neft yatağını və Sakarya qaz yatağını, eləcə də Akkuyu AES-i Türkiyə üçün “oyunun qaydalarını kökündən dəyişən” layihələr kimi qiymətləndirib.
Onun sözlərinə görə, daxili hasilatın artırılması xaricdən alınan təbii qazın maya dəyərinin və nəticə etibarilə enerji xərclərinin aşağı salınmasına kömək edə bilər.
N.Talıblı
