ABŞ Silahlı Qüvvələrinin Mərkəzi Komandanlığının (CENTCOM) rəhbəri İrana qarşı hücumların, o cümlədən neft, qaz və elektrik enerjisi infrastrukturu obyektlərinə zərbələrin bərpa edilməsini və bununla Tehrana təzyiqin artırılmasını təklif edib. Bu barədə İsrail mediası məlumat yayıb.
İsrailin “13-cü kanal”ının anonim məlumatlı siyasi mənbələrə istinadən yaydığı xəbərə görə, admiral Bred Kuper bu təklifi ötən həftə İsrailə səfəri zamanı irəli sürüb.
Telekanalın məlumatına görə, Kuper İsrail ordusunun yüksək səviyyəli rəhbərliyinin keçirdiyi operativ toplantıda Baş Qərargah rəisi Eyal Zamir və digər yüksək rütbəli komandirlərlə birlikdə iştirak edib.
Məlumata əsasən, görüş zamanı Kuper İrana qarşı hərbi əməliyyatların bərpa edilməsinə və ölkənin milli infrastrukturuna, o cümlədən qaz, neft və elektrik enerjisi sektorlarının obyektlərinə zərbələr endirilməsinə çağırıb.
Kuperə aid edilən açıqlamada deyilir: “İranın infrastrukturuna zərbələr oyunun qaydalarını dəyişəcək, iranlılara ciddi zərbə vuracaq. Mövcud vəziyyətdə onlar mövqelərini dəyişməyəcəklər”.
Bildirilir ki, CENTCOM rəhbəri İsrail hərbi rəsmilərinə hərbi əməliyyatların bərpasının yeganə variant ola biləcəyini deyib. Onun sözlərinə görə, ABŞ-ın İsraillə birlikdə İrana zərbələr endirməsi də lazım gələ bilər.
Eyni mənbələrin məlumatına görə, Kuper bu mövqeyini ABŞ Silahlı Qüvvələri Baş Qərargah Rəisləri Komitəsinin sədri, general Den Keynə də çatdırıb.
Telekanalın məlumatında qeyd olunur ki, təklif ABŞ Prezidenti Donald Trampa da təqdim edilib.
