Yer kürəsi
Yer planetinin fırlanma sürəti zaman keçdikcə yavaşlayır və bu dəyişiklik insan həyatının ritmini gələcəkdə ciddi şəkildə dəyişə bilər. AzPost xəbər verir ki, bu elmi nəticələr Ayın cazibə qüvvəsinin Yerə uzunmüddətli təsirinin bir nəticəsidir. Ayın okeanlarda yaratdığı gelgitlər fırlanmanı tədricən zəiflədən sürtünmə qüvvəsi yaradır.
Alimlər bildirirlər ki, bu proses təkcə Ayla bağlı deyil. Yer kürəsinin daxilindəki dinamik dəyişikliklər, xüsusilə maye halında olan nüvənin hərəkəti və buzlaqların əriməsi də fırlanma sürətinə təsir edən mühüm amillər sırasındadır. Yer tarixində təqribən dörd milyard il əvvəl bir gün cəmi on saat davam edirdi. Bu fakt günlərin zamanla uzandığını sübut edir.
Müasir lazer ölçüm texnologiyalarının köməyi ilə alimlər hesablayırlar ki, təxminən iki yüz milyon il sonra bir gün 25 saata çata bilər. Bu, fırlanmadakı son dərəcə cüzi dəyişikliklərin dəqiq ölçülməsi ilə mümkün olub.
Görünən odur ki, fırlanmanın bu şəkildə ləngiməsi təkcə astronomik məsələ deyil. Mütəxəssislər hesab edirlər ki, gün uzunluğundakı artım insanların bioloji ritmlərinə, yuxu rejiminə və gündəlik həyat fəaliyyətlərinə təsirsiz ötüşməyəcək. Gələcək nəsillər üçün zaman anlayışı indi düşündüyümüzdən fərqli ola bilər.
Elm adamlarının diqqət çəkdiyi bu dəyişiklik, Yer kürəsinin nə qədər dinamik və dəyişkən bir sistem olduğunu bir daha göstərir. Uzun illər ərzində sakit görünən fırlanma ritmi, əslində, daim təkamül prosesindədir.
