Borca görə
Daxili İşlər Nazirliyinin (DİN) oktyabrın 27-də ölkə ərazisində keçirdiyi əməliyyat tədbirləri nəticəsində 61 nəfər cinayət törətməkdə şübhəli bilinərək saxlanılıb, qanunsuz saxlanılan silah-sursat aşkar edilərək götürülüb.
DİN-in Mətbuat Xidmətindən verilən məlumata görə, gün ərzində ölkə ərazisində qeydə alınan 50, əvvəlki dövrlərdən bağlı qalan 5 cinayətin açılması təmin olunub.
Axtarışda olan ümumilikdə 120 nəfər saxlanılaraq aidiyyəti üzrə təhvil verilib. Onlardan 96 nəfər borclu şəxs qismində axtarışda olub.
Polis əməkdaşlarının keçirdiyi tədbirlərlə narkotiklərlə əlaqəli 22, qanunsuz saxlanılan silah-sursatın aşkarlanması və götürülməsi ilə bağlı isə 5 fakt müəyyən edilib.
Bundan başqa, ailə üzvlərini məlumatlandırmadan yaşadığı ünvanı tərk etdiyi üçün itkin düşmüş kimi axtarılan 12 nəfər tapılaraq aidiyyəti üzrə təhvil verilib.
Dələduzluğa görə axtarışda olan 7 nəfər də saxlanılaraq istintaqa təhvil verilib.
Əməliyyat tədbirləri zamanı paytaxtda və respublikanın ayrı-ayrı rayonlarında 15 qumbara və 5 tüfəng aşkar edilərək götürülüb.
DİN bildirir ki, qanunsuz saxlanılan odlu silah-sursatın aşkarlanaraq götürülməsi istiqamətində əməliyyat və profilaktik tədbirlər davam etdirilir.
