Aviabilet alışı zamanı vəd edilən imkanın reallaşmaması bank müştərisinin ciddi narazılığına səbəb olub.
AzPost xəbər verir ki, vətəndaş Ülvi Hüseynov Birbank-dan şikayət edərək trip.com saytı üzərindən aldığı aviabileti millərlə əvəz edə bilmədiyini bildirib. Onun sözlərinə görə, bilet alarkən millərin istənilən aviabiletə dəyişdirilə biləcəyi qeyd olunsa da, əməliyyat həyata keçirilməyib.
Şikayətçi məsələ ilə bağlı Birbank operatoruna müraciət etdikdə ona bildirilib ki, millərin dəyişdirilməsi yalnız AZAL, Nakhchivan Ecom, SW Travel və Silk ROVV Travel kimi təyinatlar üzrə mümkündür. Trip.com üzərindən edilən alış bu siyahıya daxil olmadığı üçün millərin istifadəsi mümkün sayılmayıb. Ülvi Hüseynov qeyd edir ki, bankın rəsmi veb səhifələrində bu cür məhdudiyyət açıq şəkildə göstərilmir və bu, müştərilərin çaşdırılmasına səbəb olur.
O, həmçinin bildirib ki, bank məsələ ilə bağlı məsuliyyətdən yayınır və müraciətə cavab almaq üçün uzun müddət gözləməli olub. Şikayətçi Birbank-ın xidmət keyfiyyətini zəif və qeyri-məsuliyyətli adlandıraraq, bu cür halların müştəri etimadına ciddi zərbə vurduğunu vurğulayıb.
Birbank məsələyə münasibət bildirərək qeyd edib ki, bonus millər yalnız birbaşa aviaşirkətlərdən alınan biletlərin dəyərini əvəz etmək üçün nəzərdə tutulub. Bankın açıqlamasına görə, tur agentlikləri və ya onlayn platformalar vasitəsilə əldə edilən aviabiletlərin bonus millərlə ödənilməsi mümkün deyil.
Bildirilir ki, millərin istifadə oluna biləcəyi əməliyyatlar üçün xüsusi MCC kodları müəyyən edilib. Bunlara 3000–3350 aralığındakı kodlar, həmçinin 4511 və 4582 daxildir. 4722 MCC kodu üzrə isə millər yalnız “AZAL NAKHCHIVAN ECOM”, “SW TRAVEL” və “SILK ROVV TRAVEL” terminal sahibləri üçün aktiv hesab olunur.
Bank əlavə edib ki, yaranmış vəziyyətin müştəridə narahatlıq doğurduğunu anlayırlar və gələcəkdə bonus millərdən istifadə zamanı bu məqamların nəzərə alınması tövsiyə olunur.
