Hörmüz boğazından gündəlik gəmi keçidlərinin sayı kəskin azalıb.
Bu barədə BMT-nin İqtisadi və Sosial Məsələlər Departamentinin (UN DESA) hesabatında bildirilib.
Hesabata əsasən, 2025-ci ildə Hörmüz boğazından gündə orta hesabla 85 gəmi keçirdisə, 2026-cı ilin aprel və may aylarında bu göstərici birrəqəmli səviyyəyə enib. İyunun sonu və iyulun əvvəlində gündəlik keçidlərin sayı təxminən 25-ə qədər artsa da, bu artım qısamüddətli olub.
İyulun ortalarında boğazdan keçən gəmilərin sayı yenidən gündə təxminən 10-a, sentyabrın əvvəlində isə cəmi 5-ə düşüb.
BMT qeyd edir ki, Hörmüz boğazından keçidin məhdudlaşması qlobal enerji bazarına ciddi təsir göstərib. Beynəlxalq Enerji Agentliyinin (IEA) hesablamalarına görə, 2026-cı ilin mart-iyul aylarında Yaxın Şərqdən enerji təchizatında orta hesabla gündə 10,7 milyon barel itki yaranıb. Münaqişənin başlanmasından iyulun sonunadək qlobal neft ehtiyatları 410 milyon barel azalıb.
Hesabatda həmçinin bildirilir ki, xam neft təchizatındakı çatışmazlıq qlobal neft emalını kəskin azaldıb. İyulda neft emalı əvvəlki ilin eyni dövrü ilə müqayisədə gündə təxminən 5 milyon barel aşağı olub. BMT yanacaq məhsullarının, xüsusilə dizelin qiymətlərinin tarixi yüksək səviyyələrə yaxın qaldığını və 2026-cı ilin sonunadək yüksək qalacağının gözlənildiyini qeyd edir.
